Афғонистонда «Толибон» ҳокимият тепасига келгач, Кобулда босқинчилик ва ўғирлик ҳолатлари кўпайди. Бу ҳақда маҳаллий TOLOnews телеканалига таяниб, «ТАСС» хабар берди.

Телеканал томонидан ўтказилган сўров давомида иқтисодий аҳвол ёмонлашаётгани фонида кўплаб афғонлар ўз оиласини боқиш учун жиноятларга қўл ураётгани маълум бўлган.

«Толиблар ҳокимият тепасига келиши билан ўғирликлар сони камаяди, деб ўйлагандик, аммо улар ҳамон давом этмоқда ва кўлами кенгайиб боряпти. Бундан ташқари, одамларнинг ўғирланиши билан боғлиқ ҳолатлар ҳам кузатилди ва бунга ҳеч ким қаршилик кўрсатмади», — дейди Кобулдаги туманлардан бирида яшовчи Муҳаммад Юнус.

TOLOnews’нинг таъкидлашича, сўнгги икки ой ичида жиноят даражаси нафақат пойтахтда, балки Афғонистоннинг бошқа вилоятларида ҳам ортиб кетган.

Шу билан бирга, «Толибон» вакилларининг маълум қилишича, улар фуқароларни ҳимоя қилиш учун барча зарур чораларни кўрмоқда. «Сўнгги 15 кун ичида турли қонунбузарликлар, жумладан, босқинчилик ва одам ўғирлашда айбланиб, 100 дан ортиқ одам ҳибсга олинди», — дейди Афғонистон ИИВ матбуот котиби Саид Хости.

Эслатиб ўтамиз, Афғонистонда август ойи ўрталарида ҳокимият тепасига келган «Толибон» ҳаракати 7 сентябрда мамлакатда муваққат ҳукумат тузиб, унинг таркибини эълон қилди. БМТнинг Афғонистондаги миссияси «Толибон» ҳукуматидаги 33 нафар аъзоларнинг аксарияти, хусусан, бош вазир, унинг икки нафар ўринбосари ва ички ишлар вазирига халқаро санкциялар қўлланганини қайд этган.

Аввалроқ Афғонистондаги туркий халқлар етакчиси, мамлакатда «Толибон» ҳукумат тепасига келгунига қадар Ашраф Ғани ҳукуматида етакчи раҳбарлардан бўлган Абдурашид Дўстум жаҳон ҳамжамиятини толиблар томонидан шакллантирилган ҳукуматни тан олмасликка чақирган эди.