Россияда сўнгги суткада яна 40 096 кишида коронавирус қайд этилди. Бу пандемия бошидан бери бир кеча-кундузда аниқланган энг юқори кўрсаткич, деб ёзади Meduza COVID-19 га қарши кураш бўйича федерал тезкор штабга таяниб.
Хабарга кўра, мамлакатда жами касалланганлар сони 8 392 697 нафарга етди. Шунингдек, инфекциядан кунлик ўлим бўйича ҳам янги антирекорд қайд этилди — 1159 киши. Расмий маълумотларга кўра, жами 235 057 киши коронавирус қурбони бўлган.
Россияда пандемия бошидан буён 7 272 053 киши касалликдан тузалди, улардан 29 318 нафари сўнгги 24 соат ичида шифохоналардан чиқарилган.
Штаб маълумотларига кўра, Россияда коронавирусни аниқлаш бўйича ўтган сутка давомида 655 та, умумий ҳисобда эса 207 миллиондан ортиқ лаборатория текширувлари ўтказилган.
Аввалроқ Россияда COVID-19 нинг янги тўлқини юз бераётгани, бунга коронавирус дельта («ҳиндча») штамми билан боғлиқ вазият сабаб бўлгани тўғрисида хабар берилганди. Оператив штаб деярли ҳар куни коронавирус билан касалланиш ва ўлим ҳолатлари бўйича антирекордлар ҳақида ҳисобот бермоқда. Шу билан бирга, Россия Соғлиқни сақлаш вазирлиги мамлакатда касалланишнинг энг юқори чўққисига ҳали эришилмаган деб ҳисоблайди.
Россия президенти Владимир Путин мамлакатда коронавирус инфекцияси билан касалланиш ҳолатлари ортаётгани сабаб 30 октябрдан 7 ноябрда қадар (4 ноябрь куни Халқ бирлиги куни нишонланади, 5 ноябрдан 7 ноябргача шундоқ ҳам дам олиш кунлари эди) ишга чиқилмайдиган ҳафталик дея эълон қилган. Эпидемиологик вазият кескин тус олган вилоятларда ишланмайдиган ҳафталикни олдинроқ жорий этишга рухсат берилган. Масалан, Москва ва Москва вилоятида ишга чиқилмайдиган кунлар 28 октябрдан бошланади.
Мавзуга доир:
- Россия президенти коронавирус туфайли ресторанларнинг тунда ишлашини тақиқлади. 60 ёшдан катта эмланмаган аҳолига ўзини яккалаш буюрилди
- Фото: Бар ва кафелар ёпилишидан бир кун олдинги Москва
- Россияда бир суткада 1072 киши коронавирусдан вафот этди. COVID-ўлимлар сони кетма-кет олтинчи кун мингтадан ортди
Изоҳ (0)