Rossiyada COVID-19 ning yangi to‘lqini yuz bermoqda, bunga koronavirus delta (“hindcha”) shtammi bilan bog‘liq vaziyat sabab bo‘lgan.
Foto: “RIA Novosti”
Rossiyada ketma-ket sakkizinchi kun COVID-19 dan sutkalik o‘limlar soni 900 kishidan oshdi. O‘tgan bir kecha-kunduzda infeksiya yuqtirganlar soni 28 717 kishini tashkil qilgan, 21 801 bemor kasallikdan tuzalgan, 984 kishi vafot etgan. Umuman olganda, Rossiyada pandemiya davrida kasallikdan 219 329 ta o‘lim qayd etilgan.
Rossiya poytaxti Moskvada koronavirusga chalinganlar soni keskin oshdi, o‘tgan sutkada poytaxtning yana 4 410 aholisida infeksiya qayd etilgan. Shu sababli Moskva ma’muriyati restoranlarga tashrif buyuruvchilarning QR-kodlarini tekshirish tizimini qayta joriy qilish zarurligini muhokama qilmoqda. Qayd etilishicha, agar poytaxtda kasallanish holati kuniga 6-7 mingtaga yetsa, QR-kod tizimini qaytarish mumkin. Shahar hokimiyati moskvaliklardan transportda, do‘konlarda va boshqa jamoat joylarida niqob taqish va qo‘lqop kiyish rejimiga qat’iy rioya qilishni so‘radi.
Madaniy-ko‘ngilochar tadbirlarga kiraverishdagi QR-kodlar tizimi allaqachon Rossiyaning 26 hududida joriy qilingan. Kirish uchun QR-kod tizimi 22 ta hududda kafe va restoranlarga, 25 ta hududda sport tadbirlariga, 13 ta hududda mehmonxonaga tashrif buyurish uchun joriy etilgan.
Rossiya hududlarida yangi cheklovlar o‘rnatildi
Ma’lum qilinishicha, Kaliningrad viloyatida “COVID-19 bilan bog‘liq o‘ta og‘ir vaziyat” tufayli muntazam tibbiy yordam ko‘rsatish to‘xtatilishi, kafe va restoranlar (8-oktabrdan ularga sertifikatsiz kirish taqiqlangan) bilan birga barcha jamoat joylarida QR-kod tizimi joriy etilishi mumkin. Hozirda Novosibirsk, Sverdlovsk va Smolensk viloyatlari, Kareliya, Mari El va Komi Respublikasida QR-kod tizimining u yoki bu shaklda joriy etilishi e’lon qilingan.
Moskvada bir qator sohalardagi ish beruvchilar xodimlarning kamida 60 foizini 15-iyulgacha birinchi doza bilan, 15-avgustgacha esa ikkinchi doza bilan emlanishini ta’minlashi kerak edi. Bryansk viloyatida 28-iyun kuni amaldorlar va ommaviy tadbirlar ishchilari, shuningdek, turli soha xodimlarining kamida 60 foizini emlash haqida e’lon qilingandi. Tver viloyatida ayrim toifadagi fuqarolarning 60 foizi 18-iyulgacha birinchi komponent bilan, 18-avgustgacha ikkinchi doza bilan emlanishi shart edi. Sankt-Peterburgda amaldorlar va davlat xizmatchilari uchun majburiy emlash joriy etilgan, ularning 65 foizi 15-avgustga qadar emlanishi kerak edi.
3-oktabr kuni Tambov viloyatida emlanishi kerak bo‘lgan kishilarning hammasini noyabr oyining boshiga qadar to‘liq emlashga qaror qilindi. Nijegorod viloyatida 7-oktabrdan boshlab sanoat ishchilari uchun majburiy emlash joriy etilgan. Ba’zi toifadagi ishchilarning kamida 60 foizi emlashning birinchi komponentini 25-iyulgacha, ikkinchisini 30-avgustgacha olishi kerak edi. Sverdlovsk viloyatida 25-oktabrda amaldorlarning barchasi emlanishi kerak. Leningrad viloyatida 15-noyabrdan boshlab ish beruvchilar ta’lim, sog‘liqni saqlash va ijtimoiy himoya sohasidagi xodimlarning hammasini vaksinatsiyadan o‘tkazishi shart.
Moskvada koronavirusga qarshi kurash choralari
Qayd etilishicha, 2020-yil 5-martdan poytaxtda koronavirus bilan bog‘liq vaziyat tufayli yuqori shaylik rejimi joriy qilingan. Ish beruvchilar xodimlarning haroratini o‘lchashi va harorati yuqori bo‘lganlarni ishdan bo‘shatishi lozim. O‘tkir respirator virusli infeksiya belgilari paydo bo‘lganda, aholi darhol tibbiy yordamga murojaat qilishi shart. Shuningdek, Moskvadagi ish beruvchilarga xodimlarni iloji boricha masofadan ishlash rejimiga o‘tkazish tavsiya etiladi. Bundan tashqari, Moskva meri Sergey Sobyanin bir-ikki hafta ichida poytaxtda keng ko‘lamli COVID-19 ekspress-test tizimini joriy etishga va’da berdi.
Sabablar
Rasmiylarning fikricha, mamlakatda kasallanishning keskin o‘sishiga sabab kuzgi mavsumning boshlanishi bo‘lib, u o‘tkir respirator virusli infeksiyalarga chalinishning ko‘payishi, shuningdek, fuqarolarning ta’tildan va dala hovlilardan ommaviy ravishda qaytishi, maktab faoliyatining qayta tiklanishi holatida aloqalar sonining keskin ko‘payishi bilan tavsiflanadi.
Shu bilan birga, terapevt-vrach, klinik farmakolog Andrey Kondraxinning fikricha, so‘nggi kunlarda koronavirusning tez tarqalishi va og‘ir kechishi delta shtammi bilan, shuningdek, rossiyaliklarning epidemiyaga qarshi choralarga beparvo munosabati bilan bog‘liq. Shifokorning aytishicha, odamlar ushbu xavfli virus bilan kasallansa-da, shifoxonaga bormasdan uyda davolanish orqali infeksiyaning yanada keng tarqalishiga zamin yaratmoqda.
