Rossiya prezidenti Vladimir Putin Federatsiya tarkibiga kiruvchi subyektlar hokimiyatlariga ko‘ngilochar tadbirlar o‘tkazishni taqiqlash hamda kechki va tungi vaqtda ovqatlanish xizmatlarini ko‘rsatishga cheklov qo‘yish bo‘yicha topshiriq berdi. Bu haqda hukumat a’zolari bilan uchrashuv yakunida Kreml saytida e’lon qilingan ko‘rsatmalar ro‘yxatiga tayanib, Meduza xabar berdi.

Bundan tashqari, gubernatorlarga vaksina olmagan 60 yoshdan katta aholini o‘zini izolyatsiya qilishga yuborish tavsiya etildi. Mazkur yosh toifasidagi ishchilar, shuningdek, surunkali kasalliklarga chalingan xodimlar, agar ular emlanmoqchi bo‘lsa, “emlanishi va immunitetini shakllantirishi uchun” to‘rt hafta davomida masofadan ishlash rejimga o‘tkazilishi kerak.

Boshqa barcha ishchilarga vaksinatsiyadan o‘tish uchun ish haqqi saqlangan holda ikki kunlik ta’til beriladi.

Rossiyada koronavirus infeksiyasi bilan kasallanish darajasi oshib bormoqda. Kunlik kasallanish va o‘limning yangi rekordlari qayd etilmoqda. Xususan, 25-oktabr kuni COVID-19 ga qarshi kurash federal shtabi bergan xabarga ko‘ra, bir sutkada 37 930 kishida infeksiya aniqlandi, 1069 kishi koronavirus tashxisi bilan vafot etdi.

Avvalgi sutkada mamlakatda 35 660 kishida, undan avval esa  37 678 kishida COVID-19 aniqlangandi. Rossiyada 19-oktabrdan beri har kuni koronavirus tufayli mingdan ortiq o‘lim qayd etilmoqda.

Putin mamlakatda koronavirus infeksiyasi bilan kasallanish holatlari ortayotgani sabab 30-oktabrdan 7-noyabrga qadar ish kunini ishga chiqilmaydigan haftalik deya e’lon qilgan. Epidemiologik vaziyat keskin tus olgan viloyatlarda ishlanmaydigan haftalikni oldinroq joriy etishga ruxsat berilgan.