Стокгольмда адабиёт йўналиши бўйича 2021 йилги Нобель муокофоти соҳиби эълон қилинди. Мукофот Буюк Британияда яшаб, ижод қилаётган танзаниялик ёзувчи Абдураззоқ Гурнага насиб қилди.
Адабиёт йўналишидаги Нобель муаллифга мустамлакачиликнинг муросасиз оқибатлари ҳамда маданиятлар ва қитъалараро сарсон бўлаётган қочоқлар қисматини ўз асарларида ёритгани учун берилди.
Ўтган йили америкалик шоира Луиза Глюк Нобель мукофотини адабиёт йўналишида қўлган киритган эди.
1948 йилда Британия мустамлакасидаги Занзибарда мусулмон араблари оиласида туғилган Гурна 20 ёшида (у вақтда орол Танзания ҳудуди ҳисобланган) Англияга кўчиб келган. У Британияда таниқли ёзувчига айланди ва замонавий постколониал илмий изланишлар муаллифлари қаторига кирди. Гурнанинг «Жаннат» (1994 йил) романи Букер ва Уитбред мукофотлари учун асосий номзодлар қаторига кирган, «Денгиз бўйида» романи (2001) ҳам Букер мукофотига номзодлик қилган.
Аввал физиология ва тиббиёт, физика, кимё йўналишлари бўйича 2021 йилги Нобель мукофотининг соҳиблари аниқланганди.
Энди 8 октябрда тинчлик учун (Ослода эълон қилинади) ва 11 октябрь куни Швеция банки томонидан Альфред Нобель хотирасига иқтисодиёт йўналишидаги лауреатлар эълон қилинади.
Мукофотни топшириш маросими 10 декабрь — Альфред Нобель вафот этган кунда бўлиб ўтади. Одатда Нобель мукофоти совриндорларини Швеция қироли Стокгольмда шахсан табрикларди (Ослода тақдирланадиган Тинчлик мукофоти совриндорлари бундан мустасно). Бироқ коронавирус пандемияси туфайли 2021 йилда худди ўтган йилги каби тантанали маросим ва зиёфат бўлмайди. Ғолиблар онлайн тарзда тақдирланади.
Изоҳ (0)