Покистоннинг Балужистон вилоятида 5,9 магнитудали зилзила юз бериши оқибатида камида 20 киши ҳалок бўлди. Бу ҳақда Покистоннинг The News агентлиги хабар берди.
Агентлик Табиий офатларга қарши кураш бошқармаси директори Нисир Насирга асосланиб, жароҳатланганлар сони 300 кишига етганини хабар қилди. Жабрланганларнинг аксарияти аёллар ва болалардир.
The News хабарига кўра, зилзила Кветта, Сиби, Харнай, Пишин, Килла Сайфулла ва бошқа шаҳарларга таъсир қилган. Маҳаллий сейсмологик марказ маълумотларига кўра, зилзила эпицентри Харнайдан унчалик узоқ бўлмаган, шунинг учун шаҳар энг жиддий зарар кўрган, энг кўп қурбонлар ҳам шу ерда қайд этилган.
Харнай комиссари ўринбосарининг айтишича, шаҳарда 50 дан ортиқ одам жароҳат олган. Унинг сўзларига кўра, айримлар оғир аҳволда касалхоналарга ётқизилган. Расмийлар қурбонлар сони ортишидан хавотирда.
Ҳукумат вакилига кўра, Харнайдаги баъзи бинолар вайрон бўлган, одамлар вайроналар остида қолган бўлиши мумкин. Шаҳарни электр энергияси билан таъминлаш узилиб қолган.
Аввалроқ «Интерфакс» Россия Фанлар академияси Ягона геофизика хизматининг Олтой-Саян филиалидан олинган маълумотларга асосланиб, Балужистон провинциясида кучли зилзила содир бўлгани ҳақида ёзганди. Зилзила маркази Сиби шаҳридан 83 километр шимолда жойлашган. Филиал ходимлари зилзилани «ҳалокатли» деб баҳолаган.
Изоҳ (0)