Теҳрон Озарбайжон томонидан хорижий давлатлар иштирокида ўтказилган ҳарбий машғулотларни провокация деб ҳисоблайди. Бу ҳақда Эрон ташқи ишлар вазири Ҳусайн Амир Абдуллоҳиянга таяниб, «Интерфакс» хабар берди.
«Озарбайжон мунтазам равишда турли мамлакатлар билан олтита машғулот ўтказди, гарчи улар ҳар бир мамлакатнинг қарорига боғлиқ бўлса-да, шубҳасиз, бу провокацион ҳаракатдир,» — деди у 6 октябрь куни Москвада Россия ташқи ишлар вазири Сергей Лавров билан музокаралар якунлари бўйича ўтказилган матбуот анжуманида.
Эрон вазирининг сўзларига кўра, ушбу машғулотларни фаоллаштириш «минтақада яхши гумон уйғотмайди».
«Эрон яқинда бир нечта машғулотлар ўтказди, лекин дипломатик каналлар орқали биз бу ҳақда минтақадаги барча давлатларга хабар бердик», — деди Эрон дипломатик идора раҳбари. Унинг қўшимча қилишича, ушбу машқларнинг моҳияти «минтақадаги тинчлик, барқарорлик ва хавфсизлик хабаридан бошқа нарса эмасди».
Ўз навбатида Россия ташқи ишлар вазири Сергей Лавров шундай деди: «Биз бу ерда ҳарбий фаолликни кучайтиришга, ҳар қандай машғулотлар провокацион хусусиятга эга бўлишига қаршимиз. Худди шу Озарбайжоннинг ўзи чегарада эронлик дўстларимиз яқинда ўтказган машғулотлар туфайли хавотир билдирган эди».
«Каспий масаласи ва чет давлатларнинг Каспий минтақаси ишларига аралашиш учун замин тайёрлаётганига келсак, биз дўстларимизга Каспий денгизининг ҳуқуқий мақоми тўғрисидаги конвенция кучга киришини таъминлаш зарурлигини бир неча бор таъкидладик. Бу ҳужжат Каспий денгизида ушбу минтақага кирмайдиган ҳар қандай давлат ҳарбий кучларининг бўлишини қатъий тақиқлайди», — деди Россия вазири.
У конвенция охирги ратификация ёрлиғи олгандан кейин кучга киришини эслатиб ўтди.
«Ҳозир бу масала Эрон парламентида кўриб чиқилмоқда. Умид қиламанки, ратификация тўғрисидаги қарор тезда қабул қилинади, шунда конвенция Каспий денгизида тегишли тартибни таъминлайдиган халқаро ҳуқуқий ҳужжатга айланади», — деди Лавров.
Изоҳ (0)