Жонс Ҳопкинс университети маълумотларига кўра, дунёда коронавирусга чалинганлар сони 236 537 162 кишини ташкил қилмоқда. Шуларнинг 4 828 794 нафари вафот этган. Шунингдек, жаҳон бўйича қўлланилган вакцина 6,370 миллиард дозадан ошди.
Касалланиш ҳолатларининг кўплиги бўйича АҚШ (44 миллион), Ҳиндистон (33,8 миллион), Бразилия (21,5 миллион), Россия (7,5 миллион) ва Туркия (7,3 миллион) энг олдинда бормоқда.
Россияда грипп ва коронавирусга қарши ягона вакцина яратилади
Россияда Гамалея номидаги марказ («Спутник V» вакцинасини ишлаб чиққан) 2022 йил охирида грипп ва коронавирусга қарши ягона вакцинанинг клиник синовларини бошлайди.Марказ директори Александр Гинсбургнинг сўзларига кўра, янги препаратга ротавирусларга қарши гибрид вакцина асос қилиб олинган, у билан биргаликда коронавируснинг турли вариантларига қарши препарат устида ҳам иш олиб борилмоқда.
«Бунинг учун технологик платформа яратиб бўлинган, аммо клиник синовлар ҳали бошлангани йўқ. Агар бу платформа билан ҳаммаси яхши бўлса, айнан шу технология иш берса, унда янада мураккаброқ вариантга ўтамиз, бу — битта вакцинада бир вақтнинг ўзида грипп гемагглютинини антигенларини ҳамда коронавируснинг S-оқсилларини жамлаш. Янги препаратнинг клиник синовлари келаси йил охирида бошланади», — деди Гинсбург.
ЖССТ КХДРга коронавирусга қарши дори-дармонларни етказишни бошлади
Жаҳон соғлиқни сақлаш ташкилоти (ЖССТ) COVID-19 га қарши тиббиёт воситаларини Шимолий Кореяга Хитойнинг Далян порти орқали етказиб беришни бошлади.Тиббий ёрдам айнан нималардан иборат эканлиги ва уни юбориш қачон бошлангани номаълум, аммо Yonhap агентлиги тахмин қилишича, юкларни юбориш ўтган ой охирида бошланган бўлиши мумкин.
Энди Шимолий Корея пандемия туфайли киритилган қатъий чегара назоратини юмшатиши мумкинлиги ҳам тахмин қилинмоқда. Аниқлик киритилишича, 2020 йил январидан буён КХДР чегаралари чет элликлар ва маҳаллий фуқаролар учун бутунлай ёпилган.
АҚШда COVID-19 га қарши эмланмаганларга органларни кўчириб ўтказишни рад этиш бошланди
Колорадо штати тиббиёт муассасалари нотижорат уюшмаси UCHealth «деярли ҳар қандай вазиятда» COVID-19 га қарши вакцинациядан ўтмаган беморларга органлар трансплантациясини рад этишни бошлади.UCHealth маълум қилишича, у органлар реципиентларининг барчасига бошқа тиббий талабларга қўшимча равишда, коронавирусга қарши эмланиш мажбуриятини юклайди. Ташкилот вакили Ден Уивернинг сўзларига кўра, мамлакатдаги бошқа органлар трансплантацияси марказлари ҳам шундай амалиётга риоя қилмоқда ёки шунга ўтмоқда.
UCHealth коронавирус ўпка кўчириб ўтказилган одамларнинг ўлимига олиб келиши ҳақидаги тадқиқотга асосланган. Уивернинг айтишича, бундай ҳолларда ўлим эҳтимоли 20—30 фоизга тенг бўлади, таққослаш учун, мамлакатда одатий даража 1,6 фоизни ташкил этади.
Мавзуга доир: АҚШ тўлиқ эмланган сайёҳлар учун ўз чегараларини очади, Pfizer вакцинаси болалар учун хавфсиз деб топилди. Коронахабарлар
Швеция ва Дания ёшларни Moderna вакцинаси билан эмлашни тўхтатди
Швеция ва Дания ҳукуматлари 1991 йилдан кейин туғилган одамларни Moderna компаниясининг коронавирусга қарши вакцинаси билан эмлашни тўхтатди. Бу миокардит каби ноёб ножўя таъсирлар юзага келиши билан боғлиқ.Швециянинг Соғлиқни сақлаш масалалари бўйича агентлиги маълумотлари вакцина олган ёшлар орасида миокардит ва перикардит ҳолатлари тарқалганини кўрсатмоқда.
«Moderna компаниясининг Spikevax вакцинасига келганда боғлиқлик янада ойдинлашмоқда, айниқса, иккинчи дозадан кейин», — дейилади агентлик баёнотида.
Айни вақтда, таъкидланишича, ушбу ножўя таъсирлар юзага келиши эҳтимоли жуда паст. Шунга қарамай, энди агентлик ёшларга Pfizer/BioNTech’нинг Comirnaty вакцинасини олишни тавсия қилмоқда.
Изоҳ (0)