Афғонистон мамлакатни тарк этган собиқ амалдорларнинг мол-мулкларини сотиш орқали қўшни давлатлардан электр бўйича қарзларини тўламоқчи. Бу ҳақда DABS энергетика корпорацияси ишлаб чиқариш бўйича директори вазифасини бажарувчи Сафиулла Аҳмадзай маълум қилди, деб ёзади «РБК».
Шунингдек, электр энергияси учун тўловларни баъзи ҳолларда йиллаб амалга оширмай келган маҳаллий аҳолининг мол-мулкини ҳам сотиш режалаштирилмоқда, дея аниқлик киритади ТОLО News телеканали.
Аҳмадзайнинг сўзларига кўра, Афғонистоннинг унга электр энергияси етказиб берган тўртта қўшни мамлакат олдида 62 миллион доллар қарзи бор. Собиқ мансабдорларнинг мол-мулкларини сотиш жараёни дастлаб «Толибон» томонидан тайинланган ҳукумат тасдиғидан ўтиши керак, шундан кейин корпорация сотишни бошлаши мумкин бўлади.
«Шундай сиёсат ишлаб чиқишимиз керакки, у бу одамлардан ишлатилган электр энергияси учун тўловларни олиш имконини берсин. Шунга асосланиб, биз уларнинг мол-мулкини сотишимиз ёки альтернатив вариантлар топишимиз мумкин», — деди Аҳмадзай.
DABS собиқ директори Омонулла Ғолибнинг таъкидлашича, бундай усул корпорацияга муаммони қисқа муддатли истиқболда ҳал қилиш имконини беради, аммо узоқ муддатли истиқбол учун ечим бошқа йўлларни қидиришга мажбур қилади.
Аввалроқ ТОlО News Афғонистон Ўзбекистон, Туркманистон, Тожикистон ва Эрондан электр энергияси учун қарздор бўлиб қолганини маълум қилганди. DABS ушбу мамлакатларга мактуб йўллаб, улардан электр энергиясини узиб қўймасликни сўради ва қарзларини тўлашга ваъда берди.
15 август куни «Толибон» Кобулга кириб, президент саройини эгаллаб олди ва мамлакатдаги ҳокимиятни ўз қўлига олганини эълон қилди. Шу куниёқ Афғонистон президенти Ашраф Ғани мамлакатдан қочиб кетди. Бир неча кундан кейин у оиласи билан Бирлашган Араб Амирликларида экани маълум бўлди. 18 август куни Ғани Афғонистон халқига мурожаат йўллаб, мамлакатга қайтишга ваъда берди. Ғани бунинг учун маслаҳатлашувлар олиб бораётганини айтди, аммо айнан ким билан эканини очиқламади.
Президент қочиб кетганидан кейин у ўзи билан моддий бойликлар, шу жумладан, жуда катта қийматда нақд пул олиб кетгани ҳақида маълумот пайдо бўлди. Ғанининг ўзи бу айбловларни ёлғон ва «мутлақо асоссиз» деб атади.
Кейинроқ «Толибон» Ашраф Ғани Афғонистондан ўғирлаб кетган пуллар қайтарилишини талаб қилди. «Ашраф Ғани давлат маблағларини ўғирлаб кетди, биз эса уларни қайтаришни талаб қиламиз. Улар халққа ва бизнинг банкларимизга тегишли», — деди Афғонистондаги муваққат ҳукумат маданият ва ахборот вазири ўринбосари Забиҳулла Мужоҳид.
Изоҳ (0)