Хитой раиси Си Цзиньпин Римда ўтказиладиган G20 (катта йигирматалик давлатлар) саммитида шахсан иштирок этмайди, деб хабар берди Bloomberg ахборот манбаларига таяниб.
«Хитой дипломатлари G20 расмийларига ХХР раиси Си Цзиньпиннинг бу ой Италияда бўлиб ўтадиган саммитда шахсан қатнашишни режалаштирмаганини маълум қилди», — дейди агентликка манбалар. Қайд этилишича, бу хабар ўтган ой G20 элчиларининг Флоренциядаги учрашувида етказилган.
Агентлик суҳбатдошларининг сўзларига кўра, бунга Хитойдаги COVID-19 га қарши кураш чоралари, жумладан, мамлакатга қайтаётган саёҳатчиларнинг мажбурий карантиндан ўтиши сабаб бўлган.
Bloomberg таъкидлашича, ХХР раисининг саммитда иштирок этмаслиги учрашувда кўтариладиган масалалар бўйича муҳим келишувларга эришишни қийинлаштиради. G20 саммити 30—31 октябрь кунлари Римда ўтказилиши режалаштирилган.
Аввалроқ АҚШ президенти Жо Байден Хитой раиси Си Цзиньпинни юзма-юз учрашувга таклиф қилгани, лекин Си Цзиньпин таклифни рад этгани ҳақида хабар берилганди.
Изоҳ (0)