AQSh prezidenti Jo Bayden Xitoy raisi Si Szinpinni yuzma-yuz uchrashuvga taklif qildi, lekin Si Szinpin taklifni rad etdi. Bu haqda ikki davlat rahbarlarining telefondagi suhbati mazmuni bilan tanish manbalarga tayanib, Financial Times xabar berdi.

Foto: kremlin.ru

Davlat rahbarlari o‘tgan hafta telefon orqali bir yarim soatlik muloqot o‘tkazgan, suhbatda Bayden xitoylik hamkasbini yuzma-yuz uchrashishga taklif qilgan. Nashrning yozishicha, Amerika rahbari AQSh va Xitoy o‘rtasidagi munosabatlarni “boshi berk ko‘chadan chiqarish”ga urinib ko‘rish niyatida bo‘lgan. Biroq, manbalarga ko‘ra, XXR raisi taklifni qabul qilish o‘rniga Vashington Pekin bilan munosabatlarda o‘z ohangini o‘zgartirishi kerakligini talab qilgan.

Bayden Pekinning Gonkong va Tayvanga nisbatan siyosati hamda uyg‘urlarga zulmi tufayli Xitoyga qarshi keskin pozitsiyani egallagan, deb yozadi Financial Times. Bunga javoban Pekin AQSh prezidenti ma’muriyatini mamlakatning ichki ishlariga aralashishda ayblagan.

Ammo keyinroq Baydenning o‘zi Si Szinpin u bilan uchrashishdan bosh tortgani haqidagi xabarni rad etdi.

“AQSh prezidenti Jo Bayden 14-sentabr kuni jurnalistlarga o‘tgan hafta telefon orqali muloqotda Si Szinpinni shaxsiy sammit o‘tkazishga taklif qilganida u rad etgani haqidagi xabarlar haqiqatga to‘g‘ri kelmasligini aytdi”, — deb yozadi Reuters. Prezidentning ushbu mavzu bo‘yicha nutqi hali Oq uy saytida e’lon qilinmagan.

Avvalroq AQSh prezidentining milliy xavfsizlik bo‘yicha maslahatchisi Jeyk Sallivan ham Financial Times ma’lumotlarini haqiqatga to‘g‘ri kelmasligini aytgan. “Bu telefon suhbatining noto‘g‘ri tavsifi. Tamom”, — dedi Sallivan.

Financial Times’da chiqqan ushbu xabar muallifi Demetri Sevastopulo Twitter’da yozishicha, nashr “o‘z versiyasida qat’iy turadi”.