Xitoy raisi Si Szinpin Rimda o‘tkaziladigan G20 (katta yigirmatalik davlatlar) sammitida shaxsan ishtirok etmaydi, deb xabar berdi Bloomberg axborot manbalariga tayanib.
“Xitoy diplomatlari G20 rasmiylariga XXR raisi Si Szinpinning bu oy Italiyada bo‘lib o‘tadigan sammitda shaxsan qatnashishni rejalashtirmaganini ma’lum qildi”, — deydi agentlikka manbalar. Qayd etilishicha, bu xabar o‘tgan oy G20 elchilarining Florensiyadagi uchrashuvida yetkazilgan.
Agentlik suhbatdoshlarining so‘zlariga ko‘ra, bunga Xitoydagi COVID-19 ga qarshi kurash choralari, jumladan, mamlakatga qaytayotgan sayohatchilarning majburiy karantindan o‘tishi sabab bo‘lgan.
Bloomberg ta’kidlashicha, XXR raisining sammitda ishtirok etmasligi uchrashuvda ko‘tariladigan masalalar bo‘yicha muhim kelishuvlarga erishishni qiyinlashtiradi. G20 sammiti 30—31-oktabr kunlari Rimda o‘tkazilishi rejalashtirilgan.
Avvalroq AQSh prezidenti Jo Bayden Xitoy raisi Si Szinpinni yuzma-yuz uchrashuvga taklif qilgani, lekin Si Szinpin taklifni rad etgani haqida xabar berilgandi.
Izoh (0)