Италияда ҳафта бошида об-ҳаво кескин ёмонлашиб, кучли ёмғир, момақалдироқ ва қаттиқ шамол бошланди. Мамлакатнинг Фуқаролик мудофаа хизмати қарорига биноан, келгуси кунлар учун учта шимолий вилоят — Лигурия, Ломбардия ва Пьемонтнинг бир қатор туманларида метеорологик хавфнинг «қизил» (энг ёмон) даражаси эълон қилинди.
4 октябрь куни Лигуриянинг Савона провинциясига, шунингдек, Генуя яқинига рекорд даражадаги ёғингарчилик (тахминан, 500 мм) тушди, бунинг оқибатида кичик дарёлар қирғоқларидан тошиб кетиб, бир неча аҳоли пунктларини сув босди. Айрим туманларда темир йўл алоқалари вақтинчалик тўхтатилди. Маҳаллий ҳокимият кўплаб мактаблар ва болалар боғчаларини, жамоат боғлари ва қабристонларни ёпди.
Италия Ҳарбий ҳаво кучлари метеорологик хизмати ходими подполковник Гуидо Гуиди 5 октябрь куни RaiNews24 телеканалига берган интервьюсида айтишича, мамлакатнинг шимолий вилоятларидаги вазият кейинги 24 соат ичида нормал ҳолатга қайтиши керак, аммо бу Апеннинда об-ҳаво яхшиланади, дегани эмас.
«Бу ёз тугаганидан кейин ёмон об-ҳавонинг илк йирик тўлқини. У бутун ҳафта давомида мамлакатнинг марказий ва жанубий ҳудудларида сезилиб туради», — деди таниқли метеоролог.
4 октябрь оқшомида ёмон об-ҳаво Римга етиб келган, кучли момақалдироқ ва қаттиқ шамол оқибатида катта-катта дарахтлар қулаб тушган ва баъзи кўчаларни сув босган. Полиция ва ўт ўчириш хизмати ходимлари хавотирга тушган фуқароларнинг чақирувларига биноан воқеа жойига, тахминан, юз марта боришга мажбур бўлди. Ноқулай об-ҳаво ҳодисалари ҳозирда Лацио маъмурий вилоятининг бир қанча туманларида, шунингдек, Абруццо, Кампания ва Сицилияда кузатилмоқда.
Изоҳ (0)