АҚШнинг Афғонистонда қолдириб кетилган бир қанча самолётлари, вертолётлари ва танкларга қарши ракеталари «Толибон» қўлига ўтди. Бу ҳақда манбаларига таяниб, Al-Arabiya телеканали хабар берди.
«Толибон’ қўлига тушган нарсаларни йўқ қилиш учун чоралар кўриш бўйича ҳали ҳеч қандай қарор йўқ. ‘Толибон’га вертолёт ва самолётдан фойдаланиш қийин бўлиши мумкин, чунки уларда учувчилар йўқ, техник хизматдан ҳам фойдалана олмайди», — деди манба.
Манбага кўра, АҚШ «Толибон»нинг ускуналардан фойдалана олмаслиги учун авиазарбаларни амалга ошириш тўғрисида қарор қабул қилишдан олдин эвакуация якунланишини кутмоқда.
Кобул аэропортида номаълум одамлар Украина фуқароларини Афғонистондан эвакуация қилишга мўлжалланган самолётни олиб қочгани ҳақида хабар берилди.
«Бизнинг самолётни якшанба куни (22 август) бегона одамлар эгаллаб олди. Сешанба куни (24 август) самолётимиз ростан ўғирлаб кетилганди — у украиналикларни олиб кетиш ўрнига, номаълум йўловчилар гуруҳи билан Эронга учиб кетган. Фуқароларни эвакуация қилиш бўйича кейинги учта уринишимиз ҳам муваффақиятсиз тугади, чунки йўловчиларимиз аэропортга бора олмади», — деди Украина ташқи ишлар вазири ўринбосари Евген Енин.
Ениннинг сўзларига кўра, Украина дипломатик хизмати ўтган ҳафта давомида «краш–тест» (синов учун атай тўқнашувлар уюштириш) режимида ишлаган. ТИВ вакили самолётнинг ўғирланиши ҳақида бошқа тафсилотларни келтирмади.
Кейинроқ Украина Ташқи ишлар вазирлиги спикери Олег Николенко самолётнинг ўғирланиши ҳақидаги маълумотни рад этди. «Кобулда ёки бошқа жойда ҳеч қандай Украина самолёти ўғирланмаган. Баъзи ОАВлар тарқатаётган «ўғирланган самолёт» ҳақидаги маълумотлар ҳақиқатга тўғри келмайди. Евген Енин украиналикларни олиб чиқишда дипломатлар дуч келган қийинчиликларни умумий қилиб тушунтирган», — деди Николенко.
«Толибон» ҳокимиятга келгандан сўнг, Украина ўз фуқароларини Афғонистондан эвакуация қилиш учун учта рейсни амалга оширди. Уларнинг охиргиси 23 август куни кечқурун Киэвнинг «Бориспол» аэропортига қўнди. ТИВга кўра, ҳозирда 50 га яқин Украина фуқароси Афғонистонда қолмоқда.
АҚШ давлат департаменти матбуот хизмати раҳбари Нед Прайснинг маълум қилишича, АҚШ Кобул халқаро аэропортининг келгуси назоратини ўз иттифоқчилари, шунингдек, «Толибон» билан муҳокама қилмоқда.
«Бу (Кобулдаги аэропортни назорат қилиш масаласи) «Толибон» билан муҳокама мавзуси бўлди. Бу бизнинг иттифоқчиларимиз билан мунозара мавзусига айланди, кўплаб ҳамкорларимиз билан муҳокама қилинди»— деди Прайс.
Унинг сўзларига кўра, томонлар «барча манфаатлар ишлаб турган аэропорт томонидан қондирилади» деган келишувга эришган.
Аввалроқ АҚШ Қуролли кучларининг Транспорт қўмондонлиги (USTRANSCОМ) раҳбари генерал Стивен Лайонс Кобул аэропортидаги вазият Афғонистондан одамларни эвакуация қилаётган ҳарбий-транспорт самолётлари учун «катта хавф» туғдиришини айтганди.
«Бу жиддий хавф. Мен батафсил маълумот бермайман. Биз SENTCОМ (АҚШ Қуролли кучлари марказий қўмондонлиги ) ва бошқа тузилмалар билан ҳаво транспорти операциялари учун таҳдидлар ва потенциал хавфлар тўғрисида маълумот олиш бўйича яқиндан ҳамкорлик қиляпмиз», — деган Лайонс.
Изоҳ (0)