Уч хонали ҳашаматли квартира, 50 минг АҚШ доллари, Lexus 570 Sport Plus 2021 йўлтанламас автомобили — ушбу совғалар мустақил Туркманистон тарихидаги биринчи Олимпиада медали совриндори Полина Гуревага мамлакат президенти Гурбангули Бердимуҳамедов номидан топширилди.
Туркманистон давлат жисмоний тарбия ва спорт институтининг 21 ёшли талабаси 14 мамлакат вакиллари иштирок этган 59 килограмм вазн тоифасида оғир атлетика мусобақаларида кумуш медални қўлга киритди.
Совғаларни топшириш бўйича тадбирнинг тантанали қисмини очар экан, Туркманистон бош вазири ўринбосари, мамлакатда хизмат кўрсатган мураббий Сердар Бердимуҳамедов президент табригини ўқиб эшиттирди. Унда Бердимуҳамедов терма жамоа аъзоларини Туркманистон спорти тарихида Токио–2020 ёзги Олимпия ўйинларида қўлга киритилган биринчи медал билан табриклади.
«Машаққатли ва мунтазам машғулотларнинг ажойиб натижаси, кучли ирода ва ватанга бўлган буюк муҳаббат тимсолига айланган ушбу муҳим воқеа бахтиёр спортчилар, илҳомланган ёшлар ва бутун халқ орасида чексиз ғурур туйғусини уйғотди», — дейилади давлат раҳбарининг табригида.
Шу билан бирга, Туркманистон президенти ўз нутқида Гуреванинг Олимпия ўйинларида эришган муваффақияти «мустақил юртнинг дунё бўйлаб шуҳратини, нуфузи ва обрўсини оширганини» ҳамда мамлакат мустақиллигининг 30 йиллиги учун энг яхши совға» бўлганини алоҳида таъкидлади. Давлат раҳбарининг сўзларига кўра, бу «мамлакатда ёш олимпиячиларни тайёрлаш учун кенг имкониятлар яратишга қаратилган давлат сиёсатининг натижасидир».
Сўнг Туркманистон президентининг фармонлари ва буйруқлари ўқиб эшиттирилди, унга мувофиқ Полина Гуреванинг биринчи мураббийи Аҳмед Сариев «Мустақил Туркманистонга бўлган буюк муҳаббати учун» ордени билан тақдирланди. Оғир атлетика бўйича Туркманистон терма жамоаси бош мураббийи Артур Эмирянга 2021 йилда чиқарилган Toyota Camry премиум класс автомобили, Полина Гуревага эса спорт соҳасида энг олий бўлган «Хизмат кўрсатган спорт устаси» унвони берилди.
«Туркманистон мустақиллигининг 30 йиллиги муносабати билан мен медалимни туркман халқига ва ҳурматли президентга бағишладим», — деди 2020 йилги Олимпия ўйинлари вице-чемпиони. У давлат раҳбарига Туркманистон спорти ривожига кўрсатилаётган катта эътибор учун миннатдорлик билдирди.
Полина Гурева журналистларга берган қисқа интервьюсида машғулотларни давом эттиришини ва уч йилдан сўнг Парижда бўладиган навбатдаги Олимпиадада Туркманистон учун олтин медални қўлга киритишга ҳаракат қилишини айтди.
Эслатиб ўтамиз, Токио шаҳрида бўлиб ўтган ХХХII ёзги Олимпия ўйинларида Ўзбекистон терма жамоаси умумий ҳисобда 5 та медал қўлга киритди ва умумжамоа ҳисобида 32-ўринни эгаллади. Токио Олимпия ўйинлари олтин медал эгаларига Chevrolet Tahoe автомобили ва 4 сотихли ҳовли калитлари топширилди, бронза медалига эга чиққанлар Chevrolet Trailblazer ва 2 хонали уй билан тақдирланди. Шунингдек, Токио—2020 да қатнашган ҳар бир спортчи 5 минг доллар миқдоридаги мукофот пулига эга бўлиши белгиланди.
Изоҳ (0)