«Толибон» Афғонистонни бошқариш учун 12 кишилик кенгаш тузади

«Толибон» раҳбарлари Афғонистонни бошқариш учун 12 кишидан иборат кенгаш тузмоқчи. Бу ҳақда манбаларига таяниб, Foreign Policy хабар берди.

Нашр маълумотларига кўра, кенгаш таркибида қуйидаги энг нуфузли уч киши ҳам бўлади:

• Мулла Абдуғани Биродар — «Толибон»нинг Доҳадаги сиёсий идораси раҳбари;
• «Толибон» ҳарбий комиссияси раҳбари мулла Моулавий Ёқуб — ҳаракат асосчиси мулла Умарнинг ўғли;
• Ҳалил ал-Раҳмон Ҳаққоний — «Ҳаққоний тармоғи» гуруҳининг юқори мартабали аъзоси.

«Толибон» Афғонистонда президент ёки бошқа ягона раҳбар лавозимини қайта тиклашни истамайди, лекин шу билан бирга, улар аввалги ҳукумат аъзоларига янги кенгашдан ўрин таклиф қилишни режалаштирмоқда. Шу тарзда «Толибон» халқаро ҳамжамият эътирофига сазовор бўлиш имкониятини ошириш учун иложи борича инклюзив кўринадиган бошқарув органини яратмоқчи, деб ёзади Foreign Policy.Нашр манбасига кўра, «Толибон», шунингдек, Панжшер арслони лақабини олган дала қўмондони Аҳмадшоҳ Масъуднинг ўғли Аҳмад Масъудни ҳам ҳукмрон кенгашда кўришни истаган бўларди. 1990 йилларда Шоҳ Масъуд «Толибон»га қарши курашаётган гуруҳлар иттифоқи — Шимолий Альянсни бошқарган, 2001 йилда у суиқасдда ўлдирилган.

Аммо кичик Масъуднинг кенгашга кириши даргумон, чунки у Афғонистоннинг «Толибон» назоратига ўтмаган сўнгги вилояти — Панжшерда жангариларга қарши кучларни бошқармоқда.

«Толибон» Панжшердаги қаршилик кучларини қуршаб олишни бошлаган. 22 август куни «Толибон» ўзини қаршилик кучлари етакчиси деб эълон қилган Аҳмад Масъудга ультиматум қўйганди.  «Толибон» баёнотига кўра, Масъуднинг тарафдорлари тўрт соат ичида қуролларини ташламаса, улар «жазоланади». Мурожаатга «Толибон»нинг Панжшерга қараб кетаётгани акс этган видеотасвирлар илова қилинган.

Масъуд Asharq al-Awsat’га берган интервьюсида музокаралар йўли орқали «Толибон» билан қўшма ҳукумат тузишга тайёрлигини маълум қилди. Унинг сўзларига кўра, мамлакатда экстремистик ҳукумат тузиш қабул қилинмайди, чунки бу Афғонистоннинг ўзи учун ҳам, минтақа учун ҳам таҳдидга айланади. «Агар улар қурол билан Панжшерга кирса, биз сўнгги одамимизгача ҳимоя қилишга тайёрмиз, аммо тинчлик яратишга имкон бериш керак, гарчи бу тинчлик ‘Толибон’ билан бўлса ҳам» — деди Масъуд.

Ультиматумдан кўп ўтмай «Толибон» Панжшер вилоятига «юзлаб жангчиларини» юборганини маълум қилди.