«Толибон» бир қатор вазирлик ва идораларга вақтинчалик раҳбарлар тайинлади. Жумладан, Садр Иброҳим ички ишлар вазири вазифасини бажарувчи, Гул Оға молия вазири вазифасини бажарувчи этиб тайинланди, Нажибуллоҳга эса разведка хизмати раҳбарининг вазифалари юкланди. «Толибон», шунингдек, ўз вакилларини таълим, олий таълим вазирлари ва Кобул губернатори лавозимларига тайинлади, деб ёзади «ТАСС» афғон агентлигига таяниб.
Бундан ташқари, «Толибон» Ҳожи Муҳаммад Идрисни мамлакат Марказий банки раҳбари вазифасини бажарувчи этиб тайинлади. Қайд этилишича, Идриснинг Афғонистон «иқтисодиётини тартибга солиши кутилмоқда».
«Ҳожи Муҳаммад Идрис Афғонистон Марказий банкининг янги раҳбари вазифасини бажарувчи этиб тайинланди. Энди унинг асосий вазифалари давлат молия ва банк муассасалари фаолиятини ташкил этиш, шунингдек, мамлакат аҳолисининг муаммоларини ҳал қилишдан иборат бўлади », — деб ёзади «Толибон» расмий вакили Забиҳулла Мужоҳид.
Афғонистон Марказий банкининг собиқ раҳбари Ажмал Аҳмадий илгари айтганидек, «Толибон» давлат захираларининг 0,1 фоизидан кўпроғига эгалик қилолмайди, чунки уларнинг катта қисми АҚШ томонидан музлатилган. Аҳмадийнинг фикрича, ҳозирги вазиятда «Толибон» инфляция ошмаслиги ва аҳоли қашшоқлашмаслиги учун капитал оқимини назорат қилиши, шунингдек, мамлакатдаги доллар активларидан фойдаланишни чеклаши керак.
Аввалроқ «Толибон» раҳбарлари Афғонистонни бошқариш учун 12 кишидан иборат кенгаш тузмоқчи экани хабар қилинганди.
«Толибон» Афғонистонда президент ёки бошқа ягона раҳбар лавозимини қайта тиклашни истамайди, лекин шу билан бирга, улар аввалги ҳукумат аъзоларига янги кенгашдан ўрин таклиф қилишни режалаштирмоқда. Шу тарзда «Толибон» халқаро ҳамжамият эътирофига сазовор бўлиш имкониятини ошириш учун иложи борича инклюзив кўринадиган бошқарув органини яратмоқчи, деб ёзади Foreign Policy.
Нашр манбасига кўра, «Толибон», шунингдек, Панжшер арслони лақабини олган дала қўмондони Аҳмадшоҳ Масъуднинг ўғли Аҳмад Масъудни ҳам ҳукмрон кенгашда кўришни истаган бўларди. Аммо кичик Масъуднинг кенгашга кириши даргумон, чунки у Афғонистоннинг «Толибон» назоратига ўтмаган сўнгги вилояти — Панжшерда жангариларга қарши кучларни бошқармоқда.
Изоҳ (0)