Коронавируснинг барча штаммларидан ҳимояловчи антитана топилди, АҚШ махсус хизматлари COVID-19 келиб чиқиши ҳақида ҳисобот тақдим этади. Коронахабарлар

Жонс Ҳопкинс университети маълумотларига кўра, дунёда коронавирусга чалинганлар сони 212 557 520 кишига етди, шуларнинг 4 441 505 нафари вафот этган. Касалланганлар сони бўйича АҚШ (35,9 миллион киши), Ҳиндистон (32,4 миллион), Бразилия (20,5 миллион), Франция (6,7 миллион) ва Россия (6,6 миллион) етакчилик қилмоқда.

АҚШнинг Сент-Луис шаридаги Вашингтон университети олимлари коронавируснинг турли хил вариантларини зарарсизлантирадиган антитанани кашф этди. Тадқиқот натижалари Иммунитй журналида чоп этилган шунингдек, ўқув юртининг веб-сайтида эълон қилинган.

Тадқиқотчилар сичқонлар танасига рецептор-боғловчи доменни — «корона»нинг тиканларида жойлашган оқсил бўлагини киритди. Кейин улар 43 та нейтраллаштирувчи оқсилга эга антитаналар ҳосил қилувчи ҳужайраларни ажратиб олди. Петри идишидаги тажрибалар давомида олимлар бу антитаналарнинг SARS-CoV-2 вирусига қарши курашиш қобилиятини ўрганди.

Вазифани энг яхши бажарган тўққизтаси кемирувчиларнинг танасига қайтадан киритилди. Икки нейтраллаштирувчи оқсил SARS-CoV-2 га қарши энг самарали экани аниқланди. Олимлар уларни SARS-CoV-2 нинг барча асосий штаммларига (алфа, бета, гамма, дельта, каппа ва йота) ҳамда бошқа потенциал хавфли вариантларга қарши синаб кўрди. Охир-оқибат, ягона антитана —SARS2-38 барча штаммларни зарарсизлантиришга муваффақ бўлди.

Бундан ташқари, олимлар ушбу SARS2-38 антитананинг вирус билан курашишига тўсқинлик қилиши мумкин бўлган SARS-CoV-2 мутациясини аниқлади. Аммо бу мутация фақат 0,04 фоиз ҳолларда учрайди.

АҚШ разведка хизматларининг коронавирус пайдо бўлиши сабабларини текшириш натижалари ҳақидаги ҳисоботи 24 август куни тайёр бўлади ва АҚШ президенти Жо Байденга топширилади. Ҳисоботнинг ошкор қилинмаган версияси оммага бир неча кундан кейин тақдим этилади.

«Одатда ошкор қилинмаган версияни оммага тақдим этиш учун бир неча кун керак бўлади. Албатта, аввалига президентга аниқланган ҳамма нарса ҳақида маълумот берилади, менда (ошкор қилинмаган версия чиқарилишининг) аниқ санаси йўқ, лекин менимча, бу икки кун ёки ундан кўпроқ вақт олади», — деди Оқ уй матбуот котиби Жен Псаки журналистларга.

Август ойининг ўрталарида CNN манбаларга таяниб, Америка разведкаси коронавирус келиб чиқишининг сабабларини икки ойдан ортиқ ўрганиб чиққанидан сўнг, вирус лабораторияда ишлаб чиқилганми ёки табиий равишда пайдо бўлганми, деган версияларда ягона тўхтамга кела олмагани ҳақида хабар берганди. Текширув жараёнидан хабардор манбалардан бирининг таъкидлашича, ҳисоботнинг янги версиясида «ғайриоддий нарса йўқ».

АҚШ президенти Жо Байден май ойининг охирида АҚШ разведка ҳамжамияти COVID-19 қандай тарқала бошлагани тўғрисида етарлича аниқ маълумотга эга эмаслигини айтганди. Байден разведка хизматларига 90 кун ичида барча мавжуд маълумотларни ўрганиш ва унга янги ҳисобот тайёрлаш бўйича саъй-ҳаракатларни икки баравар оширишни буюрган.

Эмланган аҳолиси кўп ва жамоавий иммунитет юқори бўлган мамлакатларда коронавируснинг оғир ва ўлим билан якунланувчи ҳолатлари сезиларли даражада камайди.

Москва давлат университети профессори, биология фанлари доктори, вирусолог Алексей Аграновскийнинг таъкидлашича, бундай мамлакатларда касалланиш ҳолатларининг ортишига фақат COVID-19 нинг янги ва юқумлироқ штаммлари сабаб бўлиши мумкин. Аммо, бу ҳолатларда ҳам коронавирусга қарши эмланган беморлар эмланмаганларга қараганда осонроқ тузалиб кетади.

«Жамоавий иммунитет ҳалигача ўз аҳамиятини йўқотмаган, шунингдек, биринчи навбатда эмланмаганларни энг самарали вакциналар билан эмлаш керак. 60—70 фоиз аҳоли эмлаб бўлингач, қайта эмлаш одатий ҳолга айланади, эришилган жамоавий иммунитетни сақлаб қолиш ҳам зарур», — дея қўшимча қилди олим.

«Жамоавий иммунитет касалликнинг тарқалишидан ҳимоя қилмайди, деб айтишга ҳожат йўқ», — деди юқумли касалликлар бўйича мутахассис, тиббиёт фанлари доктори Николай Малишев. Мисол тариқасида, у дифтерия (бўғма) ёки қизамиқ билан боғлиқ вазиятни келтирди. Малишевнинг сўзларига кўра, бу касалликларнинг тарқалишига эмлаш орқали чек қўйилган.

«Ушбу касалликларга қарши эмлаш олиб борилди, улар устида тадқиқотлар ўтказилди, якуний натижа яхши бўлди. Дифтерия билан боғлиқ даҳшатли вазиятга қарамай, вакциналар уни енгишга ёрдам берди. Албатта, уларнинг коронавирусдан фарқ бор, лекин ўхшаш томонларини ҳам келтириш мумкин», — дейди мутахассис.

Ўз навбатида, Россия Соғлиқни сақлаш вазирлигининг Урал федерал округида профилактика бўйича бош мустақил мутахассиси, тиббиёт фанлари доктори Сергей Токарев ўз интервьюсида, жамоавий иммунитетга эришиш коронавирус билан касалланишнинг кўпайишидан ҳимоя қилмаслигини айтди.

Токаревнинг сўзларига кўра, бу тенденция вақт ўтиб аҳолидаги иммунитет ҳимояси даражасининг пасайиши билан боғлиқ, шунинг учун нафақат эмлаш кампаниясини тезлаштириш, балки олти ойда қайта эмлашни ўтказиш керак.

Австралиянинг Янги Жанубий Уэльс штатидаги Бурк графлиги ҳукумати бир гуруҳ қутқарувчи итларни отишга қарор қилди. Ҳайвонлар бошпанага юборилиши керак эди, лекин шимоли-ғарбий штатда жойлашган Бурк графлиги кенгаши кўнгиллилар коронавирус туфайли жорий қилинган изоляция шароитида бутун штат бўйлаб ҳаракатланиши кераклигидан хавотирланди.

Шунинг учун, расмийлар итларни ҳеч қандай бошпанага юбормасликка, шунчаки уларни отиб ташлашга қарор қилган. Кенгашнинг ўзи ва ҳайвонлар бошпанаси бу қарордан кейин нима бўлганига изоҳ бермаган.

Шуниси эътиборга лойиқки, ҳайвонлар бошпанаси жойлашган Кобар шаҳрида пандемия бошидан бери коронавирус билан касалланиш ҳолатлари умуман қайд этилмаган. 4 мингга яқин аҳоли фойдаланиладиган канализация сувидан вируснинг фақат излари топилган.

Штат ҳукумати ҳам ҳайвонларнинг тақдирини ҳал қилишдан ўзини четга олган. Аммо бундай қотиллик ҳайвонлар ҳуқуқлари фаолларининг кескин танқидига учради.«Ҳайвонларни озод қилиш» ҳудудий кампанияси раҳбари Лиза Райан итларни отиш юзасидан зудлик билан тергов ўтказишни талаб қилди.

АҚШ озиқ-овқат ва фармацевтика идораси (FDA) Pfizer-BioNTech компаниясининг COVID-19 га қарши вакцинаси тўлиқ тасдиқлаганини эълон қилди. Шундай қилиб, ушбу вакцина АҚШда биринчи бўлиб тўлиқ тасдиқдан ўтди, бундан аввалги барча COVID-вакциналар тезлаштирилган тартибда лицензияланган эди. Pfizer бундай лицензияни АҚШда 2020 йилнинг декабрь ойида олган, ўшандан буён тахминан 204 миллион америкалик ушбу препарат ёрдамида эмланган.

Pfizer’нинг тўлиқ маъқулланиши унчалик ҳам амалий фарқ ҳосил қилмайди, аммо баъзи экспертлар вакцинага шубҳа билан қарайдиган одамларни инъекция қилишга ишонтириш учун бу ёрдам беради деб умид қилмоқда.

«Гарчи бу ва бошқа вакциналар FDA’нинг фавқулодда тасдиқлаш бўйича қатъий илмий стандартларига жавоб берса-да, FDA томонидан биринчи вакцина тўлиқ тасдиқлангандан сўнг, жамоатчилик ушбу вакцина хавфсизлик, самарадорлик ва ишлаб чиқариш сифати бўйича юқори стандартларга жавоб беришига тўлиқ ишониши мумкин», — деди FDA раҳбари вазифасини бажарувчи Жанет Вудкок.

Бундан ташқари, Америка ОАВ ёзишича, тўлиқ тасдиқлаш янада кўпроқ компания ва ташкилотларда COVID-19 га қарши мажбурий вакцинация жорий этиш имконини беради, чунки илгари бундай чорага қарши бўлганлар барча вакциналар тезлаштирилган тартибда маъқулланганини рўкач қилган.