Хитойда коронавирус тарқалиши тўхтатилди, Ҳиндистонда дунёдаги биринчи ДНК-вакцина маъқулланди. Коронахабарлар

Жонс Ҳопкинс университети маълумотларига кўра, дунёда коронавирусга чалинганлар сони 211 925 410 кишига етди, шуларнинг 4 433 615 нафари вафот этган. Касалланганлар сони бўйича АҚШ (37,7 миллион), Ҳиндистон (32,4 миллион), Бразилия (20,5 миллион), Франция (6,7 миллион) ва Россия (6,6 миллион) энг олдинда бормоқда.

Шунингдек, айни пайтгача бутун дунё бўйлаб 4,9 миллиарддан ортиқ дозада вакциналар қўлланилган.

Хитойда 22 август, якшанба куни COVID-19 га чалиниш бўйича 21 та янги ҳолат қайд этилди. Касалланганларнинг ҳаммаси чет элдан келган, дея хабар берди Хитой Халқ Республикаси Соғлиқни сақлаш давлат қўмитаси.

Шундай қилиб якшанба куни июль ойидан буён биринчи марта, мамлакат ичкарисида бирорта ҳам вирус юқиш ва юқтириш ҳолати қайд этилмаган. Ички юқиш ҳолатларнинг сўнгги авж олиши 20 июль куни бошланган, ўшанда мамлакат шарқидаги Сзянсу провинциясининг маъмурий маркази бўлган Нанкин шаҳри халқаро аэропортида хориждан келган самолётларни тозалаган ишчиларда коронавирус қайд этилганди.

Вирус Нанкин шаҳридан Хитой ҳудудининг катта қисмига тарқалди, мамлакат ичида 1,2 мингдан ортиқ инфекция юқтириш ҳолати тасдиқланди. Шу муносабат билан, ҳукумат вирус таъсирига учраган ҳудуднинг кенгайишини олдини олиш учун кучли чоралар кўрди, жумладан, қатъий локдаун жорий қилиш, касаллик тарқалиши қайд этилган ҳудудлар билан транспорт алоқаларини чеклаш ва зарарланган ҳудудлардаги деярли барча аҳолини тестдан ўтказиш каби.

COVID-19 пандемияси пайтида Хитойда 94 минг 652 кишида COVID-19 қайд этилган, 4 минг 636 киши инфекция билан боғлиқ касалликлардан вафот этган. Охирги ўлим 2021 йил январь ойида қайд этилган.

Ҳиндистон фавқулодда фойдаланиш учун коронавирусга қарши дунёдаги биринчи ДНК вакцинасини тасдиқлади. Препаратга Zydus Cadila (ZyCoV-D) деб ном берилди. У Биотехнология департаменти билан ҳамкорликда ишлаб чиқилган. Ушбу препарат Ҳиндистонда фавқулодда фойдаланиш учун Bharat Biotech компанияси томонидан ишлаб чиқарилган Covaxin’дан кейинги иккинчи маҳаллий вакцина.

Вакцина бутун мамлакат бўйлаб 28000 дан ортиқ кўнгиллилар иштирокида ўтказилган синовда 66,6 фоиз самарадорлик кўрсатган. Шундан сўнг ушбу препаратдан вояга етганлар ва 12 ёшдан катта болаларга фавқулодда фойдаланишга рухсат берилди.

Хабар қилинишича, ZyCoV-D вакцинасида вируснинг айрим генетик материаллари ишлатилган. У иммунитет тизими танийдиган ва унга жавоб берадиган ўзига хос оқсилни яратиш учун ДНК шаклида «кўрсатма» беради. Бир ёки икки дозали COVID-19 вакциналаридан фарқли ўлароқ, ZyCoV-D уч дозада юборилади.

Ишлаб чиқарувчи Cаdila Healthcаre компанияси йилига 100 дан 120 миллион дозагача ZyCoV-D ишлаб чиқаришни режалаштирмоқда.

Исроил мактабларида 12 ёшдан ошган болалар COVID-19 га қарши эмланади. Сентябрдан Исроилда мактаблар очилади, 12 ёшдан ошган болалар, ота -оналарининг рухсати билан, тўғридан-тўғри дарс пайтида коронавирусга қарши вакцина олиши мумкин бўлади.

23 август куни эрталаб Исроил ҳукумати мамлакатда ўқув йили режалаштирилган тарзда 1 сентябрдан бошланади, деган қарорга келган бўлса-да, жамоатчилик коронавирусга чалиниш ҳолатларининг кўпайиши сабабли дарсларнинг бошланишини кечиктиришга чақирди.

Шунингдек, 12 ва ундан катта ёшдаги ўқувчилар вакцинани ота-онасининг рухсати билан таълим муассасаси ҳудудида олиши тўғрисида қарор қабул қилинди. Ўқитувчилар ва бошқа ишчилар учун «яшил рухсатномалар» тизими жорий этилади, унга кўра, агар вакцинация сертификатига эга бўлса ёки COVID-19 га топширган тести салбий натижа берса, уларнинг ишлашига рухсат берилади.

Мамлакат таълим вазири Ифат Шаша-Битон бу режага қарши эди, лекин ўқув йили бошланишини кечиктирмаслик учун кейинчалик бунга рози бўлди. Якшанба куни Исроил 3 ёшдан 12 ёшгача бўлган болалардан коронавирус учун тест олишни бошлади. Тестлар бутун мамлакат бўйлаб 400 дан ортиқ жойларда ўтказилмоқда.