«Толибон» Афғонистонда тартибни тиклаш учун бошқа давлатларнинг ҳарбий ёрдамига муҳтож эмас. Бу ҳақда Россия ташқи ишлар вазири ўринбосари Олег Сиромолотов айтиб ўтди. Унинг қўшимча қилишича, ҳарбийларни юбориш Россия манфаатларига тўғри келмайди.
«Саволни бундай қўйиш долзарб эмас. Бундай қадам бизнинг манфаатларимизга тўғри келмайди. Қолаверса, Афғонистоннинг янги расмийлари мамлакатда тартибни тиклай бошлади ва ҳеч кимнинг ҳарбий ёрдамига муҳтож эмас», — деди у.
Шунингдек, Сиромолотовнинг маълум қилишича, Россия «Толибон»ни террорчилик ташкилотлари рўйхатидан чиқаришга шошилмайди. Унга кўра, Москва Афғонистондаги «Толибон» режимини тан олиш борасида ҳам худди шундай позицияга амал қилади.
«Биз ‘Толибон’ ҳаракатини Россиянинг террорчилик ташкилотлари рўйхатидан чиқаришга, Афғонистоннинг янги ҳукуматини тан олишга шошилмоқчи эмасмиз. Биз Афғонистон янги ҳукуматининг амалий қадамлари ва БМТ Хавфсизлик Кенгашининг тегишли қарорларидан келиб чиқамиз», — деди Сиромолотов.
Россия ташқи ишлар вазири ўринбосарининг таъкидлашича, «Толибон» ҳарбий ҳаракатлар тугаганини эълон қилган, ҳукумат амалдорлари, мамлакатнинг АҚШ ва НАТО контингентларига хизмат қилган фуқароларига амнистия эълон қилинган. Шунингдек, «Толибон» ҳаракати шариат доирасида аёлларнинг ҳуқуқларини ҳурмат қилиш ниятидалигини маълум қилди ва «маҳаллий аҳоли ва хорижий дипломатик ваколатхоналар хавфсизлиги кафолатларини тасдиқлаб, жамоат тартибини ўрнатишни бошлади. Москва, шунингдек, «Толибон»нинг «Афғонистон ҳудудидан учинчи давлатларга қарши фойдаланишга» рухсат бермаслик ҳақидаги даъволарини ҳам муҳим деб ҳисоблайди.
Аввалроқ Россия президенти Владимир Путин «Толибон»нинг Афғонистонни эгаллаб олгани юзасидан биринчи марта фикр билдирганди. Путиннинг сўзларига кўра, «Толибон» Афғонистоннинг деярли бутун ҳудудини назорат қилаётгани «бу ҳақиқат, айнан шу воқеликдан келиб чиқиб ҳаракат қилиш керак».
Изоҳ (0)