Байден қандай ҳолатда «Толибон»га қарши санкциялар жорий этилишини маълум қилди

АҚШ президенти Жо Байденнинг маълум қилишича, «Толибон»га қарши санкциялар жорий этиш тўғрисидаги қарор ҳаракат аъзоларининг хатти-ҳаракатларига боғлиқ бўлади. Байден бу ҳақда Оқ уйдаги матбуот анжуманида айтиб ўтди.

Буюк Британия қаттиқ талаб қилаётгани боис Байден ҳам «Толибон»га қарши муайян шароитларда санкцияларни қўллаб-қувватлайдими, деган саволга давлат раҳбари «ҳа» деб жавоб берди. «Бу уларнинг хатти-ҳаракатларига боғлиқ», — қўшимча қилди у.

Президентнинг таъкидлашича, «Толибон» ҳозирча АҚШ кучларига қарши ҳаракат қилмаган, шунингдек, америкаликларнинг эвакуация учун Кобул аэропортига киришига тўсқинлик қилмаслик ҳақидаги ваъдаларида «ҳозирча содиқ турибди».

Байден энди «Толибон»га ишонадими ёки йўқми, деган саволга давлат раҳбари: «Мен ҳеч кимга, жумладан, сизга ҳам ишонмайман», — деб жавоб берди.

«Толибон» ҳокимиятга келишига сабаб бўлган АҚШ қўшинларини Афғонистондан олиб чиқиш қарори ҳақида гапирар экан, Байден бу тўғри қарор эканини таъкидлади. «Мен ўйлаётган фикр тарихда қолади, бу мантиқий, оқилона ва тўғри қарор эди. Менинг вазифам — ҳеч ким қабул қилмайдиган ёки қабул қилишни хоҳламайдиган қарорларни қабул қилиш. Мен шундай қилдим ва ишончим комилки, урушга янги аёллар ва эркакларни юбормаслик ҳақидаги ушбу қарорда мен бутунлай ҳақман. Урушга бориш учун, аслида, энди ҳеч қандай сабаб йўқ эди».

Буюк Британия дунё етакчиларини «Толибон»га қарши янги санкциялар киритиш масаласини кўриб чиқишга жалб қилмоқчи. Лондон 24 август куни бўлиб ўтадиган G7 мамлакатлари йиғилишида чекловларни муҳокама қилишни режалаштирмоқда.

Британиянинг фикрича, «Толибон» инсон ҳуқуқларини бузса ва жангариларга ўз ҳудудидан бошпана сифатида фойдаланишга рухсат берса, АҚШ, Италия, Франция, Германия, Япония ва Канададан иборат G7 иқтисодий санкциялар жорий этиш ва ёрдамни тўхтатиш масаласини кўриб чиқиши керак.

«Халқаро ҳамжамият хавфсиз эвакуацияни таъминлаш, гуманитар инқирознинг олдини олиш ва афғон халқини қўллаб-қувватлаш, сўнгги 20 йил ичида эришилган ютуқларни мустаҳкамлаш учун биргаликда ҳаракат қилиши жуда муҳим», — деди Буюк Британия бош вазири Борис Жонсон.

Ўтган ҳафта Байден G7 етакчилари «Толибон»га қарши биргаликдаги ёндашувни ишлаб чиқишини айтганди. Шунингдек, унинг маълум қилишича, Жонсон Германия канцлери Ангела Меркель, Франция президенти Эммануэль Макрон ва Италия бош вазири Марио Драги билан икки томонлама музокаралар ўтказган.

Британия матбуоти хабарига кўра, Жонсон кўпроқ одамларни эвакуация қилиш учун Байденни Америка ҳарбийларини Афғонистондан олиб чиқиш муддатини узайтиришга ундамоқчи. 22 август куни Байден АҚШ ҳарбийларини Афғонистондан олиб чиқиш муддатини узайтириш масаласини муҳокама қилаётганини айтди, лекин бунга зарурат бўлмаслигига умид билдирди. Унинг сўзларига кўра, Вашингтон G7 иттифоқчиларининг сўровига биноан муддатни узайтириши мумкин.

Ўтган ҳафта Буюк Британия ташқи ишлар вазири Доминик Рааб «Толибон»га босим ўтказиш учун санкциялар жорий этиш эҳтимолини эълон қилди. Ғарб дипломатларидан бирига кўра, «Толибон»га қарши санкцияларнинг дарҳол кучга кириши даргумон.