АҚШ ва Буюк Британияга эвакуация учун қўшимча вақт берилмайди. Бу ҳақда «Толибон» вакили Суҳайл Шоҳин маълум қилди. Унинг таъкидлашича, «Толибон» ушбу мамлакатларнинг қуролли кучларини Афғонистондан олиб чиқиш муддати узайтирилишига рози бўлмайди. Агар хорижий контингент белгиланган санага қадар мамлакатни тарк этмаса, у ҳолда ҳаракат тарафидан жавоб кўрсатилади.
«Бу қизил чизиқ. Президент Байден 31 августгача барча ҳарбий кучларини олиб чиқиб кетишини эълон қилган. Шунинг учун уларнинг Афғонистонда қолиши чўзилса, бу улар зарурат бўлмаса ҳам ўз истилосини кенгайтираётганини англатади», — деди Шоҳин Sky News телеканалига берган интервьюсида.
Жангарилар вакилининг айтишича, эвакуация жараёнини узоқ давом эттириш «мамлакатлар ўртасида ишончсизликни келтириб чиқаради». «Агар улар ўз истилосини давом эттириш ниятида бўлса, бу реакцияга сабаб бўлади», — дея қўшимча қилди Суҳайл Шоҳин.
Аввалроқ АҚШ президенти Жо Байден август ойининг ўрталаридан бери 28 минг, июлдан бери 33 минг одам эвакуация қилинганини айтганди, шу билан бирга, эвакуация тезлашган: сўнгги 36 соат ичида 11 минг киши эвакуация қилинган.
«Толибон» ҳокимиятни эгаллаб олганидан кейин кўплаб мамлакатлар Афғонистондан эвакуация қилиш ишларини олиб бормоқда. Шу сабабли тартибсизлик ва тиқилинч юзага келган, оқибатда Кобул аэропорти ва унинг атрофида камида 20 киши ҳалок бўлди. Жо Байденнинг таъкидлашича, афғонларни эвакуация қилиш тарихдаги энг катта ҳаво кўприги ҳосил қилди. «Толибон»нинг айтишича, афғонлар қўрққанидан эмас, балки Ғарб мамлакатларига кўчиб ўтишни истаганидан қочмоқда.
Аввалроқ Кобул аэропорти яқин икки кунга ёпилиши, бу аллақачон унинг ҳудудида бўлиб турган одамларни эвакуация қилиш учун кераклиги маълум қилинган эди. Шунингдек, «Толибон» жангарилари Кобул аэропортидаги эвакуация жараёнига аралашишга уринган тақдирда, АҚШ уларга тезда жавоб қайтариши ҳақида огоҳлантирган эди.
«Толибон» Кобул аэропортидаги эвакуация ишларига аралашмасликка ваъда берган. Аммо америкаликлар ва уларнинг иттифоқчилари билан ҳамкорлик қилган афғонистонликлар «Толибон» уларнинг кетишига тўсқинлик қилишидан қўрқмоқда.
The New York Times хабарига кўра, «Толибон» сўроқ қилиш ва жазолаш учун АҚШ ҳарбийлари билан ҳамкорлик қилган афғонларни қидира бошлаган. NYT таъкидлашича, «Толибон» рўйхатдаги одамларни, жумладан, Кобул аэропорти яқинидан ҳам қидирмоқда, аэропорт ҳозир мамлакатни тарк этиш мумкин бўлган ягона жой.
Изоҳ (0)