Jons Hopkins universiteti ma’lumotlariga ko‘ra, dunyoda koronavirusga chalinganlar soni 211 925 410 kishiga yetdi, shularning 4 433 615 nafari vafot etgan. Kasallanganlar soni bo‘yicha AQSh (37,7 million), Hindiston (32,4 million), Braziliya (20,5 million), Fransiya (6,7 million) va Rossiya (6,6 million) eng oldinda bormoqda.
Shuningdek, ayni paytgacha butun dunyo bo‘ylab 4,9 milliarddan ortiq dozada vaksinalar qo‘llanilgan.
Xitoyda 22-avgust, yakshanba kuni COVID-19 ga chalinish bo‘yicha 21 ta yangi holat qayd etildi. Kasallanganlarning hammasi chet eldan kelgan, deya xabar berdi Xitoy Xalq Respublikasi Sog‘liqni saqlash davlat qo‘mitasi.
Shunday qilib yakshanba kuni iyul oyidan buyon birinchi marta, mamlakat ichkarisida birorta ham virus yuqish va yuqtirish holati qayd etilmagan. Ichki yuqish holatlarning so‘nggi avj olishi 20-iyul kuni boshlangan, o‘shanda mamlakat sharqidagi Szyansu provinsiyasining ma’muriy markazi bo‘lgan Nankin shahri xalqaro aeroportida xorijdan kelgan samolyotlarni tozalagan ishchilarda koronavirus qayd etilgandi.
Virus Nankin shahridan Xitoy hududining katta qismiga tarqaldi, mamlakat ichida 1,2 mingdan ortiq infeksiya yuqtirish holati tasdiqlandi. Shu munosabat bilan, hukumat virus ta’siriga uchragan hududning kengayishini oldini olish uchun kuchli choralar ko‘rdi, jumladan, qat’iy lokdaun joriy qilish, kasallik tarqalishi qayd etilgan hududlar bilan transport aloqalarini cheklash va zararlangan hududlardagi deyarli barcha aholini testdan o‘tkazish kabi.
COVID-19 pandemiyasi paytida Xitoyda 94 ming 652 kishida COVID-19 qayd etilgan, 4 ming 636 kishi infeksiya bilan bog‘liq kasalliklardan vafot etgan. Oxirgi o‘lim 2021-yil yanvar oyida qayd etilgan.
Hindiston favqulodda foydalanish uchun koronavirusga qarshi dunyodagi birinchi DNK vaksinasini tasdiqladi. Preparatga Zydus Cadila (ZyCoV-D) deb nom berildi. U Biotexnologiya departamenti bilan hamkorlikda ishlab chiqilgan. Ushbu preparat Hindistonda favqulodda foydalanish uchun Bharat Biotech kompaniyasi tomonidan ishlab chiqarilgan Covaxin’dan keyingi ikkinchi mahalliy vaksina.Vaksina butun mamlakat bo‘ylab 28000 dan ortiq ko‘ngillilar ishtirokida o‘tkazilgan sinovda 66,6 foiz samaradorlik ko‘rsatgan. Shundan so‘ng ushbu preparatdan voyaga yetganlar va 12 yoshdan katta bolalarga favqulodda foydalanishga ruxsat berildi.
Xabar qilinishicha, ZyCoV-D vaksinasida virusning ayrim genetik materiallari ishlatilgan. U immunitet tizimi taniydigan va unga javob beradigan o‘ziga xos oqsilni yaratish uchun DNK shaklida “ko‘rsatma” beradi. Bir yoki ikki dozali COVID-19 vaksinalaridan farqli o‘laroq, ZyCoV-D uch dozada yuboriladi.
Ishlab chiqaruvchi Cadila Healthcare kompaniyasi yiliga 100 dan 120 million dozagacha ZyCoV-D ishlab chiqarishni rejalashtirmoqda.
Mavzuga doir: Hindistonda so‘nggi uch kundan buyon ilk bor eng kam odamda COVID-19 aniqlandi va emlanish bo‘yicha rekord o‘rnatildi
23-avgust kuni ertalab Isroil hukumati mamlakatda o‘quv yili rejalashtirilgan tarzda 1-sentabrdan boshlanadi, degan qarorga kelgan bo‘lsa-da, jamoatchilik koronavirusga chalinish holatlarining ko‘payishi sababli darslarning boshlanishini kechiktirishga chaqirdi.
Shuningdek, 12 va undan katta yoshdagi o‘quvchilar vaksinani ota-onasining ruxsati bilan ta’lim muassasasi hududida olishi to‘g‘risida qaror qabul qilindi. O‘qituvchilar va boshqa ishchilar uchun “yashil ruxsatnomalar” tizimi joriy etiladi, unga ko‘ra, agar vaksinatsiya sertifikatiga ega bo‘lsa yoki COVID-19 ga topshirgan testi salbiy natija bersa, ularning ishlashiga ruxsat beriladi.
Mamlakat ta’lim vaziri Ifat Shasha-Biton bu rejaga qarshi edi, lekin o‘quv yili boshlanishini kechiktirmaslik uchun keyinchalik bunga rozi bo‘ldi. Yakshanba kuni Isroil 3 yoshdan 12 yoshgacha bo‘lgan bolalardan koronavirus uchun test olishni boshladi. Testlar butun mamlakat bo‘ylab 400 dan ortiq joylarda o‘tkazilmoqda.
Izoh (0)