Байден АҚШ қўшинларини Афғонистондан олиб чиқиш ҳақидаги қарорини тушунтирди

АҚШ президенти Жо Байден Америка қўшинларини Афғонистондан олиб чиқиш тўғрисидаги қарорини ушбу кампанияда йўқотилган АҚШ ҳарбийларининг рўйхати билан изоҳлади. Бу ҳақда Оқ уйга таяниб, «РБК» хабар берди.

Байденнинг сўзларига кўра, у жиддий қарор қабул қилиши керак эди: ё АҚШни унга кунига 150-300 миллион долларга тушган 20 йиллик урушдан олиб чиқиши ёки Америка кучлари сонини кўпайтириб, кампанияни давом эттириши керак эди.

«Бу карточкани ҳар куни ёнимда олиб юраман — биз йўқотган одамлар рўйхати: 2448 америкалик ўлди, 20 722 киши яраланди… Ва мен урушни тугатишга қарор қилдим», — деди Байден қайдномага қараб.

Шунингдек, Байденнинг сўзларига кўра, АҚШ Афғонистондаги ҳарбий амалиётини давом эттирса, Россия ва Хитой бундан хурсанд бўларди.

«Тасаввур қилинг, сиз Москва ёки Пекиндасиз. Бизнинг Афғонистондан кетишимиздан мамнун бўлармидингиз ёки йўқ?» — дея сўради у журналистдан Оқ уйда ўтказилган матбуот анжуманида. Шундан сўнг Байден кулди ҳамда АҚШ афғон можаросига узоқ вақтга ўралашиб қолганини кўрганда Москва ва Пекин хурсанд бўлган бўларди, деди.

АҚШ Афғонистонни тарк этишидан Россия Федерацияси ва Хитой мамнун эмас, деган фикрни Байден ва унинг маъмуриятидаги баъзи кишилар илгари ҳам айтган. Шу билан бирга, кўплаб Ғарб экспертлари Хитой, аксинча ҳозир Афғонистондаги таъсирини кенгайтириш ва у ерда иқтисодий лойиҳаларини амалга ошириш имкониятига эга бўлганини қайд этмоқда. Бундан ташқари, европалик ва америкалик экспертларнинг таъкидлашича, АҚШдан фарқли ўлароқ Россия ҳам, Хитой ҳам, афтидан, «Толибон» Афғонистонда ҳокимият тепасига келганидан ажабланмаган.

Апрель ойида Байден Америка қўшинларининг барчасини Нью-Йорк ва Вашингтонда 2001 йил 11 сентябрда юз берган терактларга 20 йил тўладиган кунгача олиб чиқиб кетишни ваъда қилган эди. Кейинроқ муддат 31 августга сурилди. Июлга келиб Афғонистондан АҚШ ҳарбий контингентининг 90 фоизи чиқиб кетди. Шундан кейин «Толибон» ҳукумат ҳарбий кучларига қарши ҳужумларни кучайтирди. 15 август куни жангарилар Кобулдаги президент саройига кирди ва Афғонистонни тўлиқ эгаллаб олганини эълон қилди. Президент Ашраф Ғани мамлакатдан қочиб кетди.