Кобул аэропортида отишма юз берди. Бир нафар ҳарбий хизматчи ҳалок бўлди

Кобул аэропортига киришда ўтказиш пунктларидан бирининг ёнида отишма юз берди. Бу ҳақда Германия Қуролли кучлари (бундесвер) ўз Twitter’ида маълум қилди.

Отишма маҳаллий вақт билан эрталабки 04:00 (Тошкент вақти билан 04:30) атрофида содир бўлган. Унда бир томондан «номаълум ҳужумчилар», иккинчи томондан эса Афғонистон хавфсизлик кучлари жангчилари қатнашган. Улардан бири ҳалок бўлган, яна уч киши яраланган.

Отишмада Америка ва Германия ҳарбийлари ҳам иштирок этган, уларнинг ҳеч бири жабрланмаган. Отишма сабаблари ва уни ким бошлагани номаълум.

Афғонистон хавфсизлик кучлари — ҳокимият тепасига «Толибон» келгунига қадар Афғонистонни америкаликлар кўмагида бошқарган ҳукуматнинг қўшинлари.

15 август куни «Толибон» ҳаракати жангарилари Афғонистонда ҳокимиятни ўз қўлига қайтариб олгач, мамлакатни тарк этишнинг ягона йўли Кобул аэропорти бўлиб қолмоқда. Уни НАТО кучлари қўриқламоқда, у ердан Ғарб мамлакатлари фуқаролари ва уларга ёрдам берган афғонлар эвакуация қилинмоқда.

Ҳуқуқ ҳимоячилари ҳисоб-китобларига кўра, аэропорт дарвозаси олдида қарийб 10 минг киши тўпланган, улар чет элга учиб кетишга уринмоқда. Уларнинг баъзилари эвакуация рейсларининг шассиларига осилиб олган. Ҳарбий хизматчилар оломонни тутиб туриш учун кўзни ёшлантирувчи газдан фойдаланган ва ҳавога ўқ отган.

«Толибон» ҳокимиятни эгаллаб олганидан буён ўтган бир ҳафта ичида Кобул аэропорти ва унинг атрофида тиқилинч ва саросима оқибатида камида 20 киши ҳалок бўлган.

Аввалроқ Кобул аэропорти яқин икки кунга ёпилиши, бу аллақачон унинг ҳудудида бўлиб турган одамларни эвакуация қилиш учун кераклиги маълум қилинган эди. Тегишли қарор эвакуация устидан назорат олиб бораётган Америка ҳарбийлари томонидан қабул қилинган.

Шунингдек, «Толибон» жангарилари Кобул аэропортидаги эвакуация жараёнига аралашишга уринган тақдирда, АҚШ уларга тезда жавоб қайтариши ҳақида огоҳлантирган эди.

«Толибон» Кобул аэропортидаги эвакуация ишларига аралашмасликка ваъда берган. Аммо америкаликлар ва уларнинг иттифоқчилари билан ҳамкорлик қилган афғонистонликлар «Толибон» уларнинг кетишига тўсқинлик қилишидан қўрқмоқда.

The New York Times хабарига кўра, «Толибон» сўроқ қилиш ва жазолаш учун АҚШ ҳарбийлари билан ҳамкорлик қилган афғонларни қидира бошлаган. NYT таъкидлашича, «Толибон» рўйхатдаги одамларни, жумладан, Кобул аэропорти яқинидан ҳам қидирмоқда, аэропорт ҳозир мамлакатни тарк этиш мумкин бўлган ягона жой.