Афғонистон Ҳарбий ҳаво кучларининг белгисига эга самолёт 15 август куни кечқурун Сурхондарё вилоятининг Шеробод туманида қулаб тушди. Ижтимоий тармоқларда қулаган самолёт қисмлари ва камида бир инсон жароҳатлангани акс этган видео ва фотолар тарқалди.

Фото: Telegram / Топнеwсуз

«Gazeta.uz»нинг ёзишича, Мудофаа вазирлиги ҳолатни ўрганаётганини маълум қилди, Ўзбекистон Ташқи ишлар вазирлигидан эса изоҳ олишнинг имкони бўлмаган. Нашрнинг Сурхондарёдаги манбаси икки нафар афғонистонлик ҳарбий хизматчи Республика шошилинч тиббий ёрдам илмий маркази Термиз филиалига ётқизилганини тасдиқлаган.

Қайд этилишича, бу воқеадан бир кун олдин касалхонага бошқа уч афғон аскари ҳам ётқизилган. Катта эҳтимол билан, гап Ўзбекистон Ташқи ишлар вазирлиги ўз баёнотида маълум қилган уч ярадор афғон аскари ҳақида кетмоқда. Беш нафар афғонистонликнинг аҳволи ўртача деб баҳоланмоқда. Манбанинг таъкидлашича, ярадорлар «кўкрак қафасининг пенетрал жароҳати», «мия чайқалиши» ва бошқа ташхислар билан тиббий муассасага ётқизилган.

Фото: Telegram / Топнеwсуз

Тасдиқланмаган маълумотларга кўра, самолётда бўлганлар парашют билан сакрашга улгурган.

Шунингдек, яна бир ўзбекистонлик ҳарбий хизматчининг касалхонага ётқизилгани ҳақида хабар берилмоқда. Унинг аҳволи оғир деб баҳоланмоқда. Бу афғон самолёт билан қулаши боғлиқми ёки йўқми, маълум эмас.

Сурхондарё вилояти Мудофаа ишлари бошқармаси вакили «Дарё» мухбири билан суҳбатда Шерободга Афғонистон самолёти қулаганини қисман тасдиқлади. «Кўзим билан кўрганим йўқ, аммо самолёт бор дейишди», — дейди бошқарма вакили.

«Тошкентдан етиб келган 25 нафар эксперт самолёт қулаши билан боғлиқ ҳодиса тафсилотларига аниқлик киритади. Шундан кейин самолёт қандай қулагани бўйича маълумот бера оламиз», — деди Сурхондарё вилояти Мудофаа ишлари бошқармаси вакили «Дарё» мухбири билан суҳбатда.

Ижтимоий тармоқларда Термиз аҳолиси 15 август куни портлашни эшитгани ҳақида ҳам хабарлар тарқалди, аммо бу маълумот тасдиқланмади. Бундан аввал Термиз осмонида Ўзбекистоннинг ўнлаб ҳарбий вертолётлари тинимсиз учиб ҳаво сарҳадларини қўриқлаётгани, шунингдек, БТРлар колоннаси ҳаракатланиб кетаётгани акс этган видеолар тарқалди. Видеолар Термиздаги Афғонистон билан чегара ҳудудда яшовчи фуқаролар томонидан олинган.