Ўзбекистонда ҳафта охирларига бориб ҳаво ҳарорати яна кўтарилиши кутилмоқда

Ҳафтанинг бошида салқин об-ҳаво сақланиб туради, кейинчалик яна ҳарорат кўтарилиши кутилмоқда, деб хабар бермоқда «Ўзгидромет».

Қайд этилишича, 16 август, душанба куни кундузи ҳарорат 28-33 даража, сешанба куни 30-35 даража атрофида бўлади.

Чоршанба кунидан эса салқин ҳаво массаси Ўзбекистон ҳудудидан чекина бошлайди ва унинг ўрнига Эрон ҳудудларидан нисбатан иссиқ об-ҳаво кириб келади. Ҳаво ҳарорати аста-секин кўтарилади ва ҳафтанинг охирига келиб, кечалари 18-20 даражагача, кундуз кунлари 36-38 даражагача кўтарилади.

«Бундай ҳарорат август ойининг иккинчи ярми учун бўлган ўртача кўп йиллик қийматлардан 2-3 даражага юқори бўлади. Бироқ шуни қайд этиш жоизки, ушбу даврда Ўзбекистон ҳудудида энг иссиқ йилларда ҳарорат 40-41 даражагача, жанубда эса 42-44 даражагача кўтарилган. Биз ҳафта давомида ва кейинчалик ҳам бундай иссиқни кутмаяпмиз», — деб таъкидланган хабарда.

Республика бўйича ҳафта давомида бироздан ўртачагача бўлган шамоллар билан қуруқ ва асосан кам булутли об-ҳаво сақланиб туради.

Фарғона водийси вилоятларининг айрим тоғли ҳудудларида фақат 16-авcгуст куни кечқурун момақалдироқ билан қисқа муддатли ёмғир ёғиши мумкин.