“Gazeta.uz”ning yozishicha, Mudofaa vazirligi holatni o‘rganayotganini ma’lum qildi, O‘zbekiston Tashqi ishlar vazirligidan esa izoh olishning imkoni bo‘lmagan. Nashrning Surxondaryodagi manbasi ikki nafar afg‘onistonlik harbiy xizmatchi Respublika shoshilinch tibbiy yordam ilmiy markazi Termiz filialiga yotqizilganini tasdiqlagan.
Qayd etilishicha, bu voqeadan bir kun oldin kasalxonaga boshqa uch afg‘on askari ham yotqizilgan. Katta ehtimol bilan, gap O‘zbekiston Tashqi ishlar vazirligi o‘z bayonotida ma’lum qilgan uch yarador afg‘on askari haqida ketmoqda. Besh nafar afg‘onistonlikning ahvoli o‘rtacha deb baholanmoqda. Manbaning ta’kidlashicha, yaradorlar “ko‘krak qafasining penetral jarohati”, “miya chayqalishi” va boshqa tashxislar bilan tibbiy muassasaga yotqizilgan.
Tasdiqlanmagan ma’lumotlarga ko‘ra, samolyotda bo‘lganlar parashyut bilan sakrashga ulgurgan.
Shuningdek, yana bir o‘zbekistonlik harbiy xizmatchining kasalxonaga yotqizilgani haqida xabar berilmoqda. Uning ahvoli og‘ir deb baholanmoqda. Bu afg‘on samolyot bilan qulashi bog‘liqmi yoki yo‘qmi, ma’lum emas.
Surxondaryo viloyati Mudofaa ishlari boshqarmasi vakili “Daryo” muxbiri bilan suhbatda Sherobodga Afg‘oniston samolyoti qulaganini qisman tasdiqladi. “Ko‘zim bilan ko‘rganim yo‘q, ammo samolyot bor deyishdi”, — deydi boshqarma vakili.
“Toshkentdan yetib kelgan 25 nafar ekspert samolyot qulashi bilan bog‘liq hodisa tafsilotlariga aniqlik kiritadi. Shundan keyin samolyot qanday qulagani bo‘yicha ma’lumot bera olamiz”, — dedi Surxondaryo viloyati Mudofaa ishlari boshqarmasi vakili “Daryo” muxbiri bilan suhbatda.
Ijtimoiy tarmoqlarda Termiz aholisi 15-avgust kuni portlashni eshitgani haqida ham xabarlar tarqaldi, ammo bu ma’lumot tasdiqlanmadi. Bundan avval Termiz osmonida O‘zbekistonning o‘nlab harbiy vertolyotlari tinimsiz uchib havo sarhadlarini qo‘riqlayotgani, shuningdek, BTRlar kolonnasi harakatlanib ketayotgani aks etgan videolar tarqaldi. Videolar Termizdagi Afg‘oniston bilan chegara hududda yashovchi fuqarolar tomonidan olingan.
Izoh (0)