Ўзбекистон ИИВ ходимларини ҳақорат қилган Жаҳонгир Отажонов иши судга оширилгани ҳақида хабар берилганди. 2021 йил 26 июль куни Тошкент шаҳри Жиноят ишлари бўйича Шайхонтоҳур туман судида иш кўриб чиқилди.
Иш ҳужжатларига кўра, Жаҳонгир Отажонов 2021 йил 27 июнь куни Тошкент шаҳар, Шайхонтоҳур тумани ҳудудида ижтимоий тармоқ орқали Тошкент шаҳар ИИББ ЙҲХБ ходими Ш.Сайфиддинов ва бошқа ИИО ФМБ ходимларини ҳар хил шаъни ва қадр-қимматини камситувчи сўзлар билан ҳақорат қилгани юзасидан тегишли ҳужжатлар расмийлаштирилган.
Суд мажлисида ҳуқуқбузар Ж.Отажонов ўз кўрсатмасида «Ҳақиқатан ҳам, 2021 йил 27 июнь куни Тошкент шаҳар, Шайхонтоҳур тумани ҳудудида ижтимоий тармоқ орқали Тошкент шаҳар ИИББ ЙҲХБ ходими Ш.Сайфиддинов ва бошқа ИИО ФМБ ходимларини ҳар хил шаъни ва қадр-қимматини камситувчи сўзлар билан ҳақорат қилганман. Ҳозирда айбимга тўлиқ иқрорман, қилган ишимдан пушаймонман. Ўзимга тегишли хулоса қилдим», дея ИИО ФМБ ходимларидан кечирим сўраганини маълум қилиб, суддан енгиллик беришни сўраган.
Суд ҳуқуқбузар Жаҳонгир Отажоновнинг ҳаракатларига ҳуқуқий баҳо бериб, унинг ҳаракатларида Маъмурий жавобгарлик тўғрисидаги кодексининг 41-моддасида (ҳақорат қилиш) назарда тутилган ҳуқуқбузарлик аломатлари мавжуд деб ҳисоблади.
Суд Жаҳонгир Отажоновга маъмурий жазо тайинлашда иш ҳужжатлари билан танишиб, ҳуқуқбузарнинг кўрсатмаларини тинглаб, унинг шахсини, айбига иқрорлигини ва пушаймонлигини, ўзига тегишли хулоса чиқарганини инобатга олиб, уни Маъмурий жавобгарлик тўғрисидаги кодексининг 21-моддасига (ҳуқуқбузарликнинг кам аҳамиятлилиги сабабли маъмурий жавобгарликдан озод қилиш) асосан жавобгарликдан озод қилиб, огоҳлантириш билан кифояланди.
Бундан аввал Тошкент шаҳар ИИББ Жаҳонгир Отажоновнинг ИИВ ходимлари ҳақидаги видеомурожаатига муносабат билдиргани ҳақида хабар берилганди.
Изоҳ (0)