Россияда МДҲ мамлакатларининг 700 мингдан ортиқ фуқаролари ноқонуний яшамоқда. Бу ҳақда Россия ички ишлар вазири ўринбосари Александр Горовой Озарбайжон, Арманистон, Беларусь, Қозоғистон, Қирғизистон, Молдова, Тожикистон, Туркманистон, Ўзбекистон ва Украина элчилари билан учрашувда маълум қилди, деб ёзади «РБК».
Полицияда эслатишларича, апрелда идора ноқонуний муҳожирларга ҳисобга туриш ва рухсатномаларни олиш учун ҳудудий полиция органларига мурожаат қилишни тавсия этган эди.
«Шунга қарамай, чет эл фуқароларининг ҳаммаси ҳам ИИВга мурожаат қилишга шошилмаяпти. Бугунги кунда МДҲга аъзо мамлакатларнинг 700 мингдан зиёд фуқаролари ‘сояда’ қолишда давом этмоқда», — дейилади полиция хабарида.
Бундан ташқари, Горовойнинг сўзларига кўра, 2021 йил чет эл фуқаролари томонидан содир этилган жиноятлар сони 5 фоизга ўсган. Гап жамоатчилик тартибининг бузилиши ва оммавий муштлашувлар ҳақида бормоқда.
Шунингдек, Россияда меҳнат муҳожирлари мажбурий дактилоскопиядан ўтиши маълум қилинди. Бундай қоида Россияга 90 кундан ортиқ муддатга келган чет элликлар учун тааллуқли бўлади. У 29 декабрдан кучга киради.
Аввалроқ Россия президенти Владимир Путин Россияга келган меҳнат муҳожирларини мажбурий дактилоскопик (бармоқ излари билан) рўйхатдан ўтказиш тўғрисидаги қонунни имзолаганди. Шунингдек, эндиликда Россияда оммавий муштлашувларда қатнашадиган муҳожирлар мамлакатдан чиқариб юборилади.
Мавзуга доир:
Изоҳ (0)