Тожикистон Чегара хизматининг МИ-8 вертолёти 4 август куни россиялик туристларни қутқариш учун учиб кетиб, ҳалокатга учради, деб хабар бермоқда Asia-Plus ишончли манбасига таяниб. Оқибатда бир киши — учувчи ҳалок бўлиб, яна тўрт киши турли даражада жароҳатланган.
Вертолёт Тожикистоннинг Тоғли Бадахшон мухтор вилоятининг Ванж туманидаги Рованд жамоатида жойлашган Пойи Мозор қишлоғи яқинида Абдулқаҳҳор дарасидаги Хирсон музлигига қўниш чоғида ҳалокатга учраган.
МИ-8 русумидаги вертолёт 4 август куни тоғда қолиб кетган етти нафар россияликларни қутқариш учун учиб кетган эди. Саёҳатчилар Пойи Мозор дарасидаги музликка чиқаётган вақтида улар билан алоқа узилган. Бундан аввал — 28 июль куни улар гуруҳдаги бир киши қор кўчкиси остида қолганини маълум қилган.
Сафар ташкилотчилари туроператорлар уюшмаси қошидаги тоғ-қутқарув марказига ёрдам сўраб мурожаат қилган.
Нашр манбасига кўра, вертолёт 4 август куни эрталаб 08:00 да учиб чиққан, 12:10 да эса радарлардан йўқолган ва у билан алоқа узилган.
Ҳодиса ҳақидаги тафсилотлар расман маълум қилинмаяпти. Республика Фавқулодда вазиятлар қўмитаси аввалроқ нашрга чегара патрули вертолёти учиб кетгани, улар бошқа ҳеч нарсани билмаслигини маълум қилган.
Бошқа ОАВлар жабрланганларга ёрдам бериш учун қутқарувчилар юборилгани, улар ярадорларни хавфсизроқ жойга ўтказишда кўмаклашиши ҳақида ёзмоқда. Айни вақтда ғойиб бўлган туристлар ҳам қидирилмоқда.
Таъкидланишича, Тожикистон куч тузилмалари, шу жумладан, Чегара қўшинлари ва Миллий гвардия вертолётлари баъзан қутқарув операцияларига жалб қилинади. Бу вертолётларнинг барчаси эски бўлиб, собиқ иттифоқ давридан қолган.
Изоҳ (0)