«Толибон» ҳаракати Афғонистон чегараларининг 90 фоизга яқин қисмини назорат қилмоқда. Бу ҳақда ташкилот вакили Забиулла Мужоҳид айтиб ўтди, деб ёзади «РБК».
«Туркманистон, Эрон ва Покистон билан чегара ҳудудлар ҳам — бир неча кичик участкаларни ҳисобга олмаганда, тўлиқ бизнинг назоратимиз остида», — деди у. Ҳаракат вакилининг қўшимча қилишича, Тожикистон билан чегарадош Бадахшон вилоятидан Тохар ва Кандур вилоятларигача бўлган ҳудудлар «Толибон» томонидан тўлиқ назорат қилинмоқда.
«Афғонистоннинг Ўзбекистон билан чегарасининг катта қисми ҳам ‘Толибон’ қўлида, фақат Калдар вилоятидаги Ҳайратон ҳудуди Кобул назорати остида», — деди Забиулла Мужоҳид.
Бунгача Тожикистон «Толибон» аъзолари бутун Афғонистон чегараларининг 90 фоизини эмас, балки афғон-тожик чегарасининг 80 фоизини назорат қилаётгани ҳақида баёнот берганди.
Афғонистон ҳукумати кучлари билан тўқнашув пайтида «Толибон» мамлакатдаги қишлоқ жойларнинг муҳим ҳудудларини эгаллаб олди ва йирик шаҳарларга ҳужум бошлади.
Шу билан бирга, «Толибон» Марказий Осиё давлатлари чегараларини бузмасликка ваъда берган.
Аввалроқ Россия Афғонистондаги вазият туфайли Тожикистондаги ҳарбий базасидан фойдаланишга тайёрлигини билдирганди. 20 июль куни эса Россия Афғонистон чегарасига ҳарбий техникасини жойлаштирди.
Россия танклари полигонда 5—10 август кунлари бўлиб ўтадиган ўқув машғулотларида қатнашиш учун етиб келган. Машғулотларда Россия ва Тожикистон ҳарбий хизматчиларидан ташқари, Ўзбекистон Қуролли Кучлари ҳам иштирок этади.
Машғулотлар Афғонистондаги вазиятнинг кескинлашуви фонида ўтказилмоқда.
Ўз навбатидаТожикистон президенти Эмомали Раҳмон Афғонистон муаммосини ҳарбий йўл билан ҳал қилиб бўлмаслигини айтди.
Изоҳ (0)