Австралиянинг йўловчи авиаташув хизматлари хавфсизлиги ва сифатини баҳолашга ихтисослашган AirlineRatings.com агентлиги дунёнинг энг яхши авиакомпаниялари йиллик рейтингини тақдим этди.
Авиаташувчилар бир қатор мезонлар, жумладан, йўловчиларнинг улар ҳақидаги фикрлари, тақдим этилаётган хизматлар доираси, авиапаркнинг ёши, шунингдек, авиакомпаниялар томонидан COVID-19 пандемияси фонида кўрилган чоралар бўйича баҳоланди.
AirlineRatings.com мутахассисларининг фикрига кўра, бу йилги энг яхши авиакомпания Qatar Airways бўлиб, у узоқ муддатдан бери рейтингда етакчилик қилиб келаётган Air New Zealand’нинг ўрнини эгаллади.
Қатар авиакомпанияси фойдасига келтирилган далиллар қаторида мутахассислар қуйидагиларни таъкидлади: йўловчилар учун янги маҳсулотларни жорий этиш, парвозда юқори сифатли хизмат кўрсатиш, инновацияларга, шунингдек, пандемия пайтида авиакомпания фаолиятини тўхтатмасликка ҳаракат қилиш.
Air New Zealand рейтингда иккинчи ўриндан жой олди. Кучли ўнликка шунингдек, Singapore Airlines, Qantas, Emirates, Cathay Pacific, Virgin Atlantic, United Airlines, EVA Air, British Airways кирди. Бундан ташқари, Qantas аэропортида энг яхши дам олиш хоналарига эга бўлган авиакомпания, Singapore Airlines биринчи классда энг яхши хизматларни кўрсатувчи, Virgin Australia эса энг яхши экипаж деб топилди.
Шунингдек, Европа, Осиё-Тинч океани минтақаси ва Америка бўйлаб энг арзон авиакомпаниялар номи эълон қилинди. Ушбу эътирофга EasyJet, Jetstar ва Southwest компаниялари сазовор бўлди.
Аввалроқ дунёдаги энг хавфсиз авиакомпаниялар рўйхати эълон қилинганди. Австралиянинг Qantas авиакомпанияси рўйхатда биринчи ўринда қайд этилган.
Мавзуга доир:
Изоҳ (0)