Pegasus жосуслик дастури орқали кузатиш учун танланган телефон рақамлар рўйхатига Франция президенти Эммануэль Макроннинг рақамларидан бири ҳам киритилган. Бу ҳақда Франциянинг Le Monde нашри хабар берди.
Хабарга кўра, 2017 йилдан бери Макроннинг рақами Pegasus дастури ёрдамида потенциал хакерлик учун Марокаш разведка хизмати томонидан танланган телефон рақамлари рўйхатида бўлиб келган. Шунингдек, эҳтимолий нишонлар рўйхатига Франциянинг собиқ бош вазири Эдуард Филипп ва яна 14 вазирнинг рақамлари киритилган. Мазкур рақамларнинг барчаси ҳақиқатан ҳам бузилганми ёки йўқлиги маълум эмас, деб ёзади Le Monde.
Франция президентининг расмий қароргоҳи бўлган Елисей саройининг Le Monde’га берган интервьюсида таъкидланишича, агар журналистлар келтирган фактлар рост бўлса, «демак улар жуда жиддий».
The Washington Post хабарига кўра, Pegasus орқали кузатиш нишонлари орасида 14 та давлат раҳбари бўлган. Макрондан ташқари, булар Жанубий Африка президенти Сирил Рамафоса, Ироқ президенти Барҳам Солиҳ, Марокаш қироли Муҳаммад VI, шунингдек, уч нафар амалдаги ва етти нафар собиқ бош вазирлар. Нишонлар қаторига ЖССТ раиси Тедрос Гебрейесус ва Мексиканинг собиқ президенти Фелипе Кальдерон ҳам киритилган, дея хабар беради The Guardian.
Pegasus — бу зарарли дастур бўлиб, у iOS ёки Android қурилмаларига кириб боради ва фойдаланувчига билдирмасдан хабарлар, фотосуратлар, жойлашув маълумотларига кириш, камера ва микрофонни фаоллаштиришга имкон беради.
Дастур жиноятчилар ва террорчиларни таъқиб қилиш учун мўлжалланган ва фақат давлат ҳокимияти органлари учун хизмат қилади. Бироқ бир неча кун олдин журналистлар Pegasus’дан сиёсатчи ва журналистларни оммавий кузатиш учун фойдаланилганини аниқлади.
Изоҳ (0)