Туркия шимоли-шарқидаги Ризо ва Артвин вилоятларида кучли ёмғирлар туфайли сув тошқинлари юз берди. Ушбу ҳудудларда табиий офат оқибатини бартараф этиш ҳамда қидирув-қутқарув ишлари бошланган. Бу ҳақда мамлакат Фавқулодда вазиятлар бошқармаси ахборотига асосланиб «РИА Новости» хабар берди.
«Бугун кучли ёмғирлар оқибатида Артвин вилоятидаги Архави ҳудудида сув тошқини юз берди. Архави дарёси тошган ва аҳоли яшайдиган турар жойлардаги йўллар сув остида қолган. Табиий офат оқибатида зарар кўрган фуқароларни излаш ва қутқариш ишлари давом эттирилмоқда. Ризо вилоятидаги Финдикли туманида ҳам Архави билан деярли бир хил вазият ҳукмронлик қилмоқда», — дейилади Туркия Фавқулодда вазиятлар бошқармасининг маълумотида.
Сув тошқинлари юз берган ҳудудларга Туркия ички ишлар вазири Сулаймон Сўйлу етиб келган. Унинг сўзларига кўра, тошқин оқибатида одамлар ҳалок бўлмаган, аммо икки нафар фуқарога тан жароҳати етган.
Аввал Тожикистонда сел келиши оқибатида камида 10 нафар одам ҳаётдан кўз юмгани, Хитойда сув тошқини туфайли 100 минг киши эвакуация қилингани, метрони сув босиши оқибатида ўнлаб одамлар ҳалок бўлгани хабар қилинди.
13 июль куни Наманган вилояти Косонсой туманида сел келиши оқибатида 8 киши ҳалок бўлган, кейинчалик 17 июлда табиий офат қурбонларининг сони 9 нафарга етганди. 20 июлда Шаҳрисабзнинг Кўл қишлоғига сел келиб, қишлоққа олиб кирувчи ягона йўл 10 соатга ёпилиб қолган, Шаҳрисабз туман фавқулодда вазиятлар бўлими мазкур ҳолатга расмий изоҳ берганди.Шунингдек, 20 июлда Наманганда сел оқибатида иккита кўприк шикастланган, Андижон вилоятида ҳам кучли ёмғир кузатилганди, 21 июлда сув тошқинидан жабрланган 132 нафар фуқаро эвакуация қилинган ва сув босган ҳудудларда дезинфекция ишлари олиб борилган.
Мавзуга доир: Фото: Наманганда сел оқизиб кетган автомобиллар
Изоҳ (0)