Telegram мессенжери асосчиси Павел Дуров Pegasus жосуслик дастури орқали кузатиш учун танланган потенциал нишонлардан бири бўлган. Бу ҳақда The Guardian хабар берди.
Нашр Дуровнинг Буюк Британияда рўйхатдан ўтган ва унинг Telegram’даги аккаунтига боғланган телефон рақами 2018 йилдан бери Pegasus ёрдамида хакерлик ҳужуми учун танланган рақамлар рўйхатида бўлганини аниқлади.
Дуровнинг рақами рўйхатга Бирлашган Араб Амирликлари томонидан 2018 йилда, у Финляндиядан Дубайга кўчиб ўтган йили киритилган. Pegasus ёрдамида Дуровнинг телефонига ҳақиқатан ҳам бузиб кирилганми ёки йўқ, буни телефонни текширмасдан туриб айтиш мумкин эмас, деб таъкидлайди The Guardian.
Pegasus’ни ишлаб чиққан Исроилнинг NSO компанияси баёнотига кўра, журналистлар томонидан фош этилган рўйхатда кимнингдир рақами борлиги, ўша одам Pegasus ёрдамида кузатилиш учун танланганини англатмайди.
Павел Дуров унинг телефон рақами Pegasus нишонларининг рўйхатида бўлганини тасдиқлади. «Камида 2018 йилдан буён менинг телефон рақамларимдан бири ушбу кузатув воситалари учун потенциал нишонлар рўйхатига киритилганини биламан. Шахсан мени бу безовта қилмади: 2011 йилдан бери, мен ҳали Россияда яшаётганимда, барча телефонларимга бузиб кирилган деб ўйлар эдим. Шахсий маълумотларимга кириш ҳуқуқига эга бўлган ҳар қандай кишининг ҳафсаласи пир бўлади: у Telegram функцияларининг минглаб версиялари ва ривожланиш жараёни билан боғлиқ миллионлаб хабарларга дуч келади. Хакерлар у ердан муҳим маълумотларни топа олмайди», — деди Дуров.
Ушбу ҳафтада журналистлар турли мамлакатлар ҳукумати Pegasus’дан сиёсатчилар, ҳуқуқ ҳимоячилари ва журналистларни оммавий кузатиш учун фойдаланганини аниқлади.
The Washington Post хабарига кўра, Pegasus орқали кузатиш нишонлари орасида 14 та давлат раҳбари бўлган. Улар орасида Франция президенти Эммануэль Макрон ҳам бор.
Le Monde нашрининг хабарга кўра, 2017 йилдан бери Макроннинг рақами Pegasus дастури ёрдамида потенциал хакерлик учун Марокаш разведка хизмати томонидан танланган телефон рақамлари рўйхатида бўлиб келган. Шунингдек, эҳтимолий нишонлар рўйхатига Франциянинг собиқ бош вазири Эдуард Филипп ва яна 14 вазирнинг рақамлари киритилган.
Эммануэль Макрон ушбу иш бўйича бир қатор текширувлар ўтказишни буюрди. Франция президентининг расмий қароргоҳи бўлган Елисей саройи агар журналистлар келтирган фактлар рост бўлса, демак вазият жиддий эканини таъкидлаганди.
Марокаш ҳукумати эса Макрон ва вазирларнинг смартфони Марокаш разведка хизматлари томонидан кузатилган бўлиши мумкинлиги ҳақидаги хабарларни рад этди.
«Марокаш Қироллиги ёлғонга асосланган кенг кўламли ва давомли зарар келтирувчи оммавий ахборот кампаниясини қатъиян қоралайди, асоссиз тахминларни рад этади ва уларни тарқатувчиларни ушбу эртакларнинг сезиларли ва моддий далилларини келтиришга чақиради», — дейилади қироллик баёнотида.
Расмийларнинг таъкидлашича, бундай туҳматни тарқатувчилар жавобгарликка тортилиши мумкин.
Маълумот учун, Pegasus — бу зарарли дастур бўлиб, у iOS ёки Android қурилмаларига кириб боради ва фойдаланувчига билдирмасдан хабарлар, фотосуратлар, жойлашув маълумотларига кириш, камера ва микрофонни фаоллаштиришга имкон беради.
Изоҳ (0)