YouTube’даги AutoJeff Reviews канали муаллифи АҚШнинг Виржиния штатида топилган ноёб автомобиль ҳақида маълумот берди. Блогер ўз обуначиларини 2007 йилдан буён 2,4 миллион километр йўл босган Toyota Tacoma пикапи билан таништирган. Машина эгасининг сўзларига кўра, автомобиль яхши ҳаракатланмоқда ва соз ҳолатда, деб хабар беради Motor.
Toyota Tacoma’нинг эгаси Майк Нил пикапни 2007 йили янгилигида сотиб олган. Эркак Виржиния ва Шимолий Каролина штатлари ҳудудига тиббиёт қурилмаларини етказиб бериш билан шуғуллангани сабаб кунига 800 километрга яқин йўл босади. Унинг сўзларига кўра, автомобиль ҳаддан ортиқ ишончли бўлиб чиққан. Машина 1,4 миллион километр йўл босганида Майк унинг 161 от кучини тақдим этувчи тўрт цилиндрли 2,7 литрли двигателини алмаштирган. Икки миллион километрдан кейин эса автомат узатмалар қутисининг гидротрансформатори ишдан чиққан. Эркак таваккал қилмасдан, трансмиссияни тўлиқ алмаштиришга қарор қилган.
Миллионлаб километр йўл босганига қарамай, Toyota Tacoma ёмон аҳволда эмас. Пикапнинг айрим жойлари эскирган, бироқ автомобилга яхшилаб ишлов берилса, уни бир неча юз минг километр йўл босган машиналардан ажратиб бўлмайди. Автомобиль эгасининг сўзларига кўра, пикап 14 йилдан буён 100 километр масофага 10 литрга яқин ёнилғи сарфламоқда.
Майкнинг айтишича, Tacoma’нинг одометри бир неча йил олдин 999 999 мил сонида қотиб қолган. Ўшандан буён эркак босиб ўтилган масофани ўз ҳисоблагичида ўлчамоқда ва ҳозирга қадар у 2,4 миллион километр йўл босган.
Эслатиб ўтамиз, 2020 йилнинг мартида Volvo компанияси 14 йил давомида V70 универсал модели билан 1 миллион мил (қарийб 1,6 миллион километр) масофани босиб ўтган канадалик мижозини тақдирлаган эди.
Изоҳ (0)