YouTube’dagi AutoJeff Reviews kanali muallifi AQShning Virjiniya shtatida topilgan noyob avtomobil haqida ma’lumot berdi. Bloger o‘z obunachilarini 2007-yildan buyon 2,4 million kilometr yo‘l bosgan Toyota Tacoma pikapi bilan tanishtirgan. Mashina egasining so‘zlariga ko‘ra, avtomobil yaxshi harakatlanmoqda va soz holatda, deb xabar beradi Motor.
Toyota Tacoma’ning egasi Mayk Nil pikapni 2007-yili yangiligida sotib olgan. Erkak Virjiniya va Shimoliy Karolina shtatlari hududiga tibbiyot qurilmalarini yetkazib berish bilan shug‘ullangani sabab kuniga 800 kilometrga yaqin yo‘l bosadi. Uning so‘zlariga ko‘ra, avtomobil haddan ortiq ishonchli bo‘lib chiqqan. Mashina 1,4 million kilometr yo‘l bosganida Mayk uning 161 ot kuchini taqdim etuvchi to‘rt silindrli 2,7 litrli dvigatelini almashtirgan. Ikki million kilometrdan keyin esa avtomat uzatmalar qutisining gidrotransformatori ishdan chiqqan. Erkak tavakkal qilmasdan, transmissiyani to‘liq almashtirishga qaror qilgan.
Millionlab kilometr yo‘l bosganiga qaramay, Toyota Tacoma yomon ahvolda emas. Pikapning ayrim joylari eskirgan, biroq avtomobilga yaxshilab ishlov berilsa uni bir necha yuz ming kilometr yo‘l bosgan mashinalardan ajratib bo‘lmaydi. Avtomobil egasining so‘zlariga ko‘ra, pikap 14 yildan buyon 100 kilometr masofaga 10 litrga yaqin yonilg‘i sarflamoqda.
Maykning aytishicha, Tacoma’ning odometri bir necha yil oldin 999 999 mil sonida qotib qolgan. O‘shandan buyon erkak bosib o‘tilgan masofani o‘z hisoblagichida o‘lchamoqda va hozirga qadar u 2,4 million kilometr yo‘l bosgan.
Eslatib o‘tamiz, 2020-yilning martida Volvo kompaniyasi 14 yil davomida V70 universal modeli bilan 1 million mil (qariyb 1,6 million kilometr) masofani bosib o‘tgan kanadalik mijozini taqdirlagan edi.
Izoh (0)