АP: АҚШ ҳарбийлари Афғонистондаги Баграм авиабазасини огоҳлантиришсиз тарк этган

АҚШ ҳарбийлари Афғонистондаги Баграм авиабазасини тунда тарк этган, кетиш олдидан электр энергиясини узиб қўйган ва базанинг афғонистонлик янги командирини огоҳлантирмаган, деб ёзади Associated Press афғон ҳарбийларига таяниб.

«Биз америкаликлар Баграмдан чиқиб кетгани ҳақида миш-мишларни эшитдик ... ва ниҳоят, эрталаб соат 07:00 га келиб бу ҳақиқат эканини, улар Баграмдан чиқиб кетишганини англадик», — деди объектнинг янги командири генерал Мир Асадуллоҳ Коҳистани агентликка.

Қайд этилишича, Афғонистон армияси Кобулдан бир соат узоқликда жойлашган аэродромни ўз қўлига олгунча объектга талончилар бостириб кирган. Афғон ҳарбийларининг сўзларига кўра, босқинчилар барак ва омбор чодирларини талон-торож қилган.

Ҳарбийлардан бирининг айтишича, талончилик ҳужумига Америка ҳарбийлари базадан жимгина чиқиб кетгандан кейин 20 дақиқа давомида электр қуввати узилиб, объект зулматда қолгани сабаб бўлган. Унинг таъкидлашича, Америка ҳарбийлари чиқиб кетганидан уч кун ўтиб ҳам афғон аскарлари талончилар қолдириб кетган чиқиндиларни тозалаш билан банд бўлган.

2 июль куни Fox News Афғонистондаги қўшинларни олиб чиқиш операцияси доирасида АҚШ ҳарбийлари Баграм авиабазасини тарк этгани ҳақида хабар берган эди. Associated Press хабарига кўра, бу шуни англатадики, 2500-3500 ҳарбийдан иборат АҚШ қўшинларнинг аксарияти Афғонистон ҳудудидан чиқиб кетган. АҚШ Қуролли Кучлари марказий қўмондонлиги, ўз навбатида, Вашингтон Америка контингентини Афғонистондан олиб чиқилишининг 50 фоиздан ортиғини амалга оширгани ҳақида хабар берди.

Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак.

Аввалроқ «Толибон» барча чет эл қўшинлари Афғонистонни ўз муддатида тарк этишини талаб қилгани ҳақида хабар берилганди.

Associated Press хабарига кўра, АҚШ қўшинларининг асосий қисмини олиб чиққанидан кейин Афғонистонда 650 га яқин америкалик ҳарбийни қолдирмоқчи. Таъкидланишича, Афғонистонда қоладиган ҳарбийлар дипломатларнинг хавфсизлигини таъминлайди.

Бугунга қадар Германия ва Италия Афғонистондан ўз қўшинларини олиб чиқишни якунлади.