Туркиянинг Фетҳие шаҳри яқинидаги соҳилда, Белчекиз пляжидан 50 метр масофада экскурсия сафари уюштираётган қайиқ чўкиб кетди. Қайиқ бортида 38 киши бўлган. Ҳодиса оқибатида 2 ёшли бола ҳалок бўлди, катталардан икки киши жароҳат олди, деб ёзади «Korrespondent.net».
Хабарга кўра, ҳалок бўлган болакай ота-онаси билан Франциядан Туркияга таътилга келган. «Шифокорларнинг саъй-ҳаракатларига қарамай, боланинг ҳаётини сақлаб қолиш имкони бўлмади», — дейди журналистлар.
Таъкидланишича, авариядан кейин кўпчилик ўзи мустақил равишда қирғоққа йўл олган. Ҳодисанинг айрим иштирокчиларини воқеа жойига юборилган Соҳил хавфсизлик гуруҳлари, шунингдек, сув таксилари олиб кетган.
Воқеа жойига Фетҳие губернатори Эюп Фират етиб келган. «Картернинг олд қисми тешилган ва у бўлакларга бўлина бошлаган», — деди Фират.
Маълум бўлишича, ҳодиса 3 июль, шанба куни содир бўлган, аммо бу ҳақда 5 июль куни хабар берилган. Ижтимоий тармоқларда қайиқнинг қандай бузилиб, сувга чўкаётгани акс этган видео тарқалди.
Аввалроқ Бангладешдаги Падма дарёсида тезюрар қайиқ қум ортилган юк кемаси билан тўқнашиб кетиши оқибатида 26 киши ҳалок бўлган эди.
Ўрта Ер денгизининг Тунис қирғоқлари яқинида эса ичида ноқонуний кўчаётган муҳожирлар бўлган иккита қайиқ ағдарилиб, чўкиб кетган. Ҳалокат оқибатида камида 39 киши ҳалок бўлган. Ҳалок бўлганлар орасида аёллар ва болалар ҳам бор.
Шунингдек, Россия байроғи остидаги «Арвин» қуруқ юк ташувчи кемаси Қора денгизда, Туркиянинг Бартин вилояти соҳиллари яқинида чўкиб кетгани ҳақида маълумот берилган эди.
Изоҳ (0)