Россиянинг Петропавловск-Камчацкий шаҳридан Палана посёлкасига йўловчи парвозини амалга ошираётган Ан-26 самолёти денгизга қулади. Бу ҳақда Фавқулодда вазиятлар хизмати вакилига таяниб, Meduza хабар берди.
Камчатка авиация корхонаси маълумотларига кўра, Паланадан тўққиз километр нарида қўниш пайтидаги манёврдан олдин 251-сонли рейс билан алоқа йўқолган. Қутқарувчилар бедарак йўқолган самолётни қидириб учган.
Дастлабки маълумотларда самолёт денгизга ёки Палана яқинидаги кўмир кони атрофига қулаган бўлиши мумкинлиги айтилган.
«Самолёт денгизга қулаган тахминий нуқта аниқланди», — деб ёзади «РИА Новости».
Ан-26 бортида 22 нафар йўловчи, жумладан, икки бола, шунингдек, олтита экипаж аъзоси бўлган. «ТАСС» хабарига кўра, йўловчиларнинг аксарияти Палана аҳолиси. Йўловчилар рўйхатида Палана посёлкаси раҳбари Олга Мохирева, Палана маъмурияти сафарбарлик бўлими бошлиғи Александр Андрейкин ва унинг рафиқаси, маъмурият молия бўлими бошлиғи Олга Андрейкина ҳам бўлган. Камчатка авиация корхонасининг бош директори Алексей Храбров самолёт жўнаш олдидан техник жиҳатдан яхши бўлганини айтди.
Авариянинг эҳтимолий сабаблари орасида ускуналарнинг ишламай қолиши, кўришнинг ёмонлашуви ва экипаж хатоси келтирилмоқда.
«ТАСС» хабар беришича, Ан-26 самолёти 1982 йилдан бери ишлаб келади ва унинг учишга яроқлилиги тўғрисидаги сертификат муддати 2021 йил 30 августда тугайди.
Тергов қўмитаси томонидан ҳаракат хавфсизлиги ва ҳаво транспорти эксплуатацияси қоидаларини бузиш бўйича жиноят иши қўзғатилди.
Аввалроқ Филиппинда 92 кишини олиб кетаётган ҳарбий самолёт ҳалокатга учрагани, ҳалокат қурбонлари сони 45 кишига етгани ҳақида хабар берилганди.
Изоҳ (0)