ЖССТ: дунёда COVID-19 билан касалланиш даражаси барқарорлашди

Дунёда COVID-19 билан касалланиш даражаси сўнгги икки ҳафта ичида барқарорлашди. Бу ҳақда Жаҳон соғлиқни сақлаш ташкилотининг (ЖССТ) соғлиқни сақлаш бўйича фавқулодда вазиятлар дастури ижрочи директори Майкл Райан айтиб ўтди.

«Агар сўнгги икки ҳафталик касалланиш графигини қараб чиқсангиз, унда ўзига хос барқарорлик пайдо бўлганини кўришингиз мумкин. Бу жуда юқори даражада содир бўлган», — деди у.

Унинг сўзларига кўра, дунёда коронавирус тарқалишининг ҳозирги ҳолати «икки-уч ой аввалгидан яхшироқ». Шу билан бирга, Райан айрим мамлакатларда касаллик юқтиришнинг кескин пасайиши кузатилганини, аммо бошқа давлатларда бу ҳолат аксинча эканини таъкидлади. Эпидемиологнинг фикрига кўра, бу турли хил омиллар, жумладан, коронавируснинг юқумлироқ штаммлари пайдо бўлиши, эпидемияга қарши чораларни юмшатиш ва кишилар ўртасидаги алоқалар сонининг кўпайиши билан боғлиқ.

Ўз навбатида, ЖССТ Фавқулодда касалликлар бўлими раҳбари Мария ван Керкхове дунёдаги коронавирус билан боғлиқ вазиятни «икки хил» деб таърифлади. Унинг сўзларига кўра, Америкада касалланиш бўйича янги ҳолатлар сони камайган (13 фоизга), бошқа қитъаларда эса кўпайган. Хусусан, Европада сўнгги бир ҳафта ичида инфекция юқтириш деярли 28 фоизга ошган. «Дунё мамлакатларининг камида 20 тасида касалланишнинг кескин ўсиши қайд этилди», — дея қўшимча қилди эксперт.

Икки ҳафта олдин ЖССТнинг Россиядаги расмий вакили Мелита Вуйнович коронавируснинг дельта-плюс штамми шошилинч чораларни талаб қилишини, акс ҳолда янги локдаун киритишга тўғри келишини айтганди. Унинг сўзларига кўра, вакцинацияга қўшимча равишда ниқоб режимига амал қилиш керак, чунки фақат вакцинанинг ўзи дельта штаммга қарши курашда етарли эмас.

ЖССТ вакили таъкидлашича, дельта-плюс штаммига оид вазият хавотирли, вирус тез тарқалмоқда.

Жаҳон соғлиқни сақлаш ташкилотининг ҳисоб-китобларига кўра, бутун дунёда ўтган ҳафта COVID-19 билан касалланганлар сони аввалги ҳафта билан таққослаганда ортган, ўлимлар сони эса аксинча, камайган.

Жонс Ҳопкинс университети маълумотларига кўра, пандемия бошидан бери бутун дунёда инфекция юқтириб олганлар сони 184 153 361 кишига етган, шуларнинг 3 984 557 нафари вафот этган.