Москва марказидаги Лужнецкая соҳил бўйида жойлашган пиротехника омборида катта ёнғин содир бўлди. Бу ҳақда Россия Фавқулодда вазиятлар вазирлиги матбуот хизматига таяниб, «РБК» хабар берди.
Ёнғин учинчи даражали оғирликда деб баҳоланган. Оловни ўчириш учун Москва авиация марказининг учта вертолёти, шунингдек, битта ўт ўчирувчи махсус картер жалб қилинган.
Маълум бўлишича, пиротехника воситалари билан жиҳозланган омборда ёнғин 19 июнь куни тушдан кейин содир бўлган. Ёнғин майдони 500 квадрат метрни ташкил қилган. Бино устига тутун кўтарилиб, портлашлар овози эшитилган. Дастлабки маълумотларга кўра, ушбу омборда 15 тонна портловчи моддалар сақланган. Қўшни биноларга зарар етмаган.
Ёнғин соат 19:15 да (Тошкент вақти билан 21:15 да) чекинган. Ёнғинни ўчириш пайтида уч нафар ўт ўчирувчи ва бир нафар омбор ходими жароҳат олган. Москва мэри ўринбосарининг сўзларига кўра, ўт ўчирувчилар енгил жароҳат олган.
«Икки киши касалхонага ётишдан бош тортди. Биз бирини Склифосовский институтига юбордик, у тутун ютган, бу зарарсиз ҳолат», — деди шаҳар мэри ўринбосари.
Фавқулодда вазиятлар вазирлиги ҳодиса содир бўлган жойда ҳаво сифатини текширди, улар зарарли моддалар концентрацияси рухсат этилган максимал даражадан ошиб кетмаганини аниқлади.
Москва прокуратураси ёнғин юзасидан тергов ўтказишни буюрди. Таъкидланишича, 2019 йилда омборда қоидабузарликлар аниқланган, аммо кейинчалик уларнинг барчаси бартараф қилинган. Шаҳар мэри ўринбосарининг маълум қилишича, ушбу омбордаги моддалар пиротехника воситаларини улгуржи сотадиган якка тартибдаги тадбиркорга тегишли.
Изоҳ (0)