Россиянинг Кемеров вилоятидаги Танай аэродромида бортида парашютчи-спортчилар бўлган Let L-410 самолёти ҳалокатга учради, деб ёзади Meduza.

Самолёт Россия армияси, авиацияси ва флотига кўмаклашувчи кўнгилли жамият (ДОСААФ)нинг маҳаллий бўлинмасига тегишли бўлган. Машқ қилиб учиш чоғида экипаж командири двигателлардан бири ишламай қолганини маълум қилган, шундан кейин аэродромга қайтишга қарор қилинган. Орқага бурилиш чоғида самолёт қаноти билан дарахтлар шох-шаббаларига урилган ва ерга қулаган. «Интерфакс» манбаларига кўра, самолёт 100 метр баландликдан тушиб кетган.

Самолёт бортида 19 киши бўлган. Дастлаб ДОСААФ ҳудудий бўлинмаси тўққиз киши — икки учувчи ва етти йўловчи ҳалок бўлганини маълум қилганди, кейинроқ бу хабар рад этилди. Кемеров вилояти маъмуриятининг расмий маълумотларига кўра, тўрт киши ҳалок бўлиб, 15 киши жароҳатланган. Жабрланганларнинг тўрт нафари оғир, 11 нафари — ўртача оғир аҳволда.

Бортдагилар орасида йирик бизнесмен, «Кузнецкий Южний» кўмир кони эгаларидан бири Тимур Франк ҳам бўлган. У оғир аҳволда касалхонага ётқизилган.

Ҳалокат муносабати билан Россия Тергов қўмитаси Ғарбий-Сибир транспортда тергов бошқармаси терговолди текширувини бошлади. «Интерфакс» манбасига қараганда, апрелда самолёт режали даврий техник хизмат кўрсатишдан ўтган. ДОСААФ маълум қилишича, самолёт бир кун ичидаги тўртинчи парвозини амалга ошираётган бўлган.

Let L-410 Turbolet — кўп мақсадли икки моторли самолёт бўлиб, 1960 йилларнинг охирида Чехословакияда ишлаб чиқилган. У тайёрланмаган тупроқли, ўтли, қорли майдонларда ҳамда ўчиш-қўниш йўлаги қисқа бўлган аэродромларда фойдаланиш учун мўлжалланган.