Shri-Lankadagi Kolombo portidan uncha uzoq bo‘lmagan hududda 25 tonna azot kislotasi ortilgan MV X-Press Pearl konteynerlar tashuvchi kemada portlash sodir bo‘ldi. Portlash kemada 20-may kuni yuzaga kelgan yong‘in harbiy aviatsiya va harbiy dengizchilar tomonidan o‘chirilayotgan vaqtda kuzatilgan, deb yozmoqda Reuters.

Foto: Blackseanews

Hodisa oqibatida ikki kishi jarohatlangan. Kema ekipaji voqea joyidan evakuatsiya qilingan. Kema sohil chizig‘idan 50 dengiz mili masofasiga uzoqlashtirilgan. Olovni o‘chirishning imkoni bo‘lmayapti.

Mahalliy OAV portlashdan keyin kamida sakkizta konteyner dengizga qulab tushganini xabar qilgan.

“Shri-Lankaga yong‘inni bartaraf qilish uchun Niderlandiyadan maxsus reysda juda muhim qurilma olib kelinishi kutilmoqda”, — deya vaziyat yuzasidan izoh bergan Shri-Lanka kemasozlik vaziri Roxita Abeygunavardena.

May boshida Bangladeshda yo‘lovchi tashuvchi qayiqning yuk kemasi bilan to‘qnashuvi yo‘lovchilarning o‘limiga sabab bo‘lgandi. Aprel oyida esa BAA qirg‘oqlarida Isroil yuk kemasiga hujum uyushtirilgani, mazkur holatdan keyin mamlakat harbiy dengiz kuchlari shay holatga keltirilgani xabar qilingandi.

Shuningdek, 21-aprel kuni Indoneziyada bortida 53 kishi bo‘lgan suvosti kemasi bedarak yo‘qolgan, oradan bir necha kun o‘tgach, Indoneziya harbiy dengiz kuchlari suvosti kemasidagi buyumlar topilgani, 53 nafar ekipaj a’zosining hammasi halok bo‘lganini ma’lum qilgan. Suvosti kemasi uch qismga bo‘linib ketgan holda topilgan.