Moskva markazidagi Lujnetskaya sohil bo‘yida joylashgan pirotexnika omborida katta yong‘in sodir bo‘ldi. Bu haqda Rossiya Favqulodda vaziyatlar vazirligi matbuot xizmatiga tayanib, “RBK” xabar berdi.

Yong‘in uchinchi darajali og‘irlikda deb baholangan. Olovni o‘chirish uchun  Moskva aviatsiya markazining uchta vertolyoti, shuningdek, bitta o‘t o‘chiruvchi maxsus karter jalb qilingan.

Ma’lum bo‘lishicha, pirotexnika vositalari bilan jihozlangan omborda yong‘in 19-iyun kuni tushdan keyin sodir bo‘lgan. Yong‘in maydoni 500 kvadrat metrni tashkil qilgan. Bino ustiga tutun ko‘tarilib, portlashlar ovozi eshitilgan. Dastlabki ma’lumotlarga ko‘ra, ushbu omborda 15 tonna portlovchi moddalar saqlangan. Qo‘shni binolarga zarar yetmagan.

Yong‘in soat 19:15 da (Toshkent vaqti bilan 21:15 da) chekingan. Yong‘inni o‘chirish paytida uch nafar o‘t o‘chiruvchi va bir nafar ombor xodimi jarohat olgan. Moskva meri o‘rinbosarining so‘zlariga ko‘ra, o‘t o‘chiruvchilar yengil jarohat olgan.

“Ikki kishi kasalxonaga yotishdan bosh tortdi. Biz birini Sklifosovskiy institutiga yubordik, u tutun yutgan, bu zararsiz holat”, — dedi shahar meri o‘rinbosari.

Favqulodda vaziyatlar vazirligi hodisa sodir bo‘lgan joyda havo sifatini tekshirdi, ular zararli moddalar konsentratsiyasi ruxsat etilgan maksimal darajadan oshib ketmaganini aniqladi.

Moskva prokuraturasi yong‘in yuzasidan tergov o‘tkazishni buyurdi. Ta’kidlanishicha, 2019-yilda omborda qoidabuzarliklar aniqlangan, ammo keyinchalik ularning barchasi bartaraf qilingan. Shahar meri o‘rinbosarining ma’lum qilishicha, ushbu ombordagi moddalar pirotexnika vositalarini ulgurji sotadigan yakka tartibdagi tadbirkorga tegishli.