Эрон Олий суди раиси Иброҳим Раисий мамлакат президенти сайловида 17,8 миллионта овоз тўплаб, ғолиб бўлди, деб хабар беради «ТАСС» Эрон Сайлов штаби раҳбари Жамол Ориф эълон қилган дастлабки натижаларга таяниб. Сайловда жами 28,6 миллион киши қатнашган.
Қабул қилинувчи қарорларнинг мақсадга мувофиқлиги бўйича кенгаш котиби Муҳсин Ризоий 3 миллион 300 мингдан ортиқ овоз йиғди. Марказий банк собиқ раҳбари Абдулносир Ҳимматий 2 миллион 400 минг, Мажлис (парламент) раиси ўринбосари Амир Ҳусайн Қозизода Ҳошимий 1 миллиондан зиёд овозларни қўлга киритди.
Жамол Орифнинг қўшимча қилишича, ушбу маълумотлар фақат дастлабки бўлиб, якуний натижалар кун давомида эълон қилинади.
Замонавий Эрон тарихидаги ўн учинчи президент сайловлари маҳаллий вақт билан 19 июнь, шанба куни соат 02:00 да (Тошкент вақти билан 02:30) якунланди. Овоз бериш 18 июнь, жума куни 07:00 да (Тошкент вақти билан 07:30) бошланиб, ярим тунгача давом этиши керак эди, аммо ажратилган вақтда ҳамма овоз беришга улгурмагани учун сайлов участкаларининг ишлаш вақти узайтирилди.
Мавзуга доир: Эронда президент сайлови бўлиб ўтмоқда
Изоҳ (0)