Эронда президент сайлови учун ташкил қилинган сайлов участкаларидан сайлов қутиларини олиб кетаётган вертолёт авариявий қўниш чоғида ҳалокатга учради, деб хабар бермоқда «РБК» Хузестан вилояти губернатори Сулаймоний Даштакийга таяниб.
«Ҳодиса оқибатида бир йўловчи ҳалок бўлди, у ҳуқуқ-тартибот органлари ходими бўлгани айтилмоқда», — деди губернатор.
Унинг сўзларига кўра, яна бир неча киши яраланган. Жабрланганларнинг барчаси касалхонага ётқизилган, баъзиларининг аҳволи оғир деб баҳоланмоқда.
Даштакийнинг қўшимча қилишича, авиаҳалокат вертолёт двигателида босимнинг пасайиб кетиши билан боғлиқ бўлиши мумкин.
Бу орада Эрон президенти сайловининг якуний натижалари мамлакат ички ишлар вазири Абдулризо Раҳмоний Фазлий томонидан эълон қилинди. Уларга кўра, Эрон Олий суди раиси Иброҳим Раисий 17,9 миллион киши (сайловчиларнинг 62 фоизи)нинг овозини қўлга киритиб, мамлакат президенти этиб сайланган.
Овоз беришда жами сайловчиларнинг 48,8 фоизи — 28,9 миллиондан ортиқ одам қатнашган.
АҚШ санкцияларига учраган 60 ёшли сиёсатчи 2019 йилдан бери Эрон суд ҳокимиятининг раҳбари бўлиб, ундан аввал бош прокурор вазифасини бажарган. Сайлов кампанияси давомида Иброҳим Раисий қашшоқлик ва коррупцияга қарши курашишга, тўрт йил ичида 4 миллион янги уй қуришга ва «Эронда кучли халқ ҳокимяти» қуришга ваъда берган.
2017 йилда ҳам Иброҳим Раисий президентлик учун номзодини қўйган, аммо Ҳасан Руҳонийга ютқазган эди. Раисий илгари Эрон ва олтита халқаро воситачи ўртасидаги Эрон атом битимини қаттиқ танқид қилган. Бироқ энди у бошқа номзодлар сингари, агар АҚШ битимга қайтадиган бўлса, битим шартларини бажаришга тайёрлигини билдирмоқда.
Замонавий Эрон тарихидаги ўн учинчи президент сайловлари маҳаллий вақт билан 19 июнь, шанба куни соат 02:00 да (Тошкент вақти билан 02:30) якунланди. Овоз бериш 18 июнь, жума куни 07:00 да (Тошкент вақти билан 07:30) бошланиб, ярим тунгача давом этиши керак эди, аммо ажратилган вақтда ҳамма овоз беришга улгурмагани учун сайлов участкаларининг ишлаш вақти узайтирилди.
Изоҳ (0)