Бугун,

  • USD 10920.28
  • RUB 177.49
  • EUR 11052.42

Япониядаги коронавирус пандемияси билан боғлиқ фавқулодда ҳолат 20 июндан бошлаб Токио ва бошқа бир қатор аҳоли зич жойлашган ҳудудларда бекор қилинади. Бу ҳақда Япония бош вазири Ёсихидэ Суга эълон қилди, деб ёзади «Интерфакс».

Фото: AP Photo

«Май ойининг ўрталаридан бошлаб мамлакатда вирус юқтиришлар сони камайиб бормоқда, касалхоналардаги койкалар билан боғлиқ вазият яхшиланмоқда. Бошқа томондан, айрим минтақаларда касалликка чалиниш ҳолатларининг камайиши суст», — деди Суга матбуот анжуманида.

Шу билан бирга, у фавқулодда ҳолат ўрнига Токиода ва мамлакатнинг баъзи бошқа ҳудудларида бир қатор чеклов чоралари кучга киришини маълум қилди. Ушбу чекловлар спиртли ичимликлар савдосига, бар ва ресторанларнинг иш вақтига тааллуқли бўлади. Чекловлар 11 июлгача амал қилади.

Фавқулодда ҳолат фақат Окинава префектурасида сақланиб қолади.

Японияда Олимпия ўйинларининг очилиш маросими 23 июль куни бўлиб ўтади. Мусобақалар 8 августга қадар давом этади. Мусобақага мухлислар ташриф буюриши мумкин ёки йўқлиги, шунингдек, стадионлар қай даражада тўлдирилиши ҳозирча номаълум. Бунга июнь охирига қадар аниқлик киритилиши кутилмоқда.

Бундан ташқари, Японияда эмлаш паспортлари беришни бошлаш режалаштирилаётгани ҳақида хабар қилинди. Таъкидланишича, паспортда ҳужжат эгасининг исми, туғилган йили, фуқаролик паспорти рақами, эмлаш санаси ва вакцина тури япон ва инглиз тилларида кўрсатилади. Ҳужжат бепул берилади.

Японияда эмлашлар февраль ойида бошланган. Эмлаш даражаси оширилганига қарамай, вакцина олган Япония аҳолисининг улуши бошқа ривожланган мамлакатлардагига қараганда ҳали ҳам анча паст.

Изоҳ
Асосий янгиликлар