Бишкекда коронавирус билан боғлиқ вазият ёмонлашди, янги чекловлар киритилди

Қирғизистон пойтахти Бишкекда коронавирус билан касалланиш ҳолати ортгани сабабли шаҳар ҳокимлиги кўнгилочар муассасалар фаолиятига чекловлар киритмоқда. Бу ҳақда Kloop хабар берди.

Хабарга кўра, кўнгилочар муассасалар (тунги клублар, ресторанлар, умумий овқатланиш шохобчалари, кафелар, караоке ва барлар) фаолиятига соат 23:00 дан 07:00 гача тақиқ қўйилди. Чекловлар 17 июндан кучга киради.

Ушбу қарор 16 июнь куни шаҳар ҳокимлиги вакиллари, шаҳар соғлиқни сақлаш бошқармаси ва санитария-эпидемиология назорати ходимлари иштирокидаги йиғилишда қабул қилинди. Ҳокимликнинг изоҳ беришича, мазкур чекловларга эпидемиологик вазиятнинг ёмонлашуви сабаб бўлган.

«Туманлар раҳбарлари, Давлат санитария-эпидемиология назорати маркази ва шаҳар транспорт департаменти томонидан мунтазам равишда қўшма рейдлар ўтказилиб, тадбиркорлик субъектларининг вақтинчалик санитария-эпидемиология қоидаларига риоя этиши таъминланади», — дейилади шаҳар ҳокимлиги хабарида.

Аввалроқ соғлиқни сақлаш вазири Алимқодир Бейшеналиев эпидемиологик вазият ёмонлашгани сабабли шаҳар ҳокимлигига пойтахтда баъзи чекловларни киритишни таклиф қилганини айтганди. Унинг сўзларига кўра, мамлакатда коронавирус билан касалланиш кескин ўса бошлаган ва буни учинчи тўлқин деб аташ мумкин.

«Алоқаларни давом эттириш билан ёшлар вирус ташувчисига айланмоқда. Шунингдек, жамоат транспортида мажбурий ниқоб режимига риоя қилиш ва овқатланиш шохобчаларида ижтимоий масофа бўйича тавсиялар мавжуд. Ўринбосарларим рейдлар натижаларига асосланиб, маълум қилишича, санитария қоидаларига ҳеч қаерда риоя қилинмаяпти» — деди Бейшеналиев.

15 июнь куни бўлиб ўтган брифингда соғлиқни сақлаш вазири ўринбосари Жалолидин Раҳматуллаев COVID-19’нинг учинчи тўлқини бошланганини эълон қилди. Унинг сўзларига кўра, шу сабабли расмийлар касалхоналарга 3 мингдан зиёд койкалар жойлаштирган ва яна 1,5 мингтасини захирага қолдирган.

Шунингдек, унинг таъкидлашича, ҳозирги кунда мамлакатда коронавируснинг тўрт хил штамми кезиб юрибди, хусусан, уларнинг 44 фоизини «британча» штамм, 39 фоизини Россиядан кириб келган штамм ташкил қилмоқда.

16 июнь ҳолатига кўра, Қирғизистонда жами 111 990 кишида коронавирус қайд этилган. Улардан 1912 нафари касалликдан вафот этган.